ХҮҮХДҮҮД 32 СУМААР ЦЭЦ МЭРГЭЭ СОРИВ

Үнэлэх
(0 үнэлгээ)

Их Монгол Улс байгуулагдсаны 806, Ардын хувьсгалын 91 жилийн ойн үндэсний их баяр наадмын хүүхдийн сурын харваа өчигдөр эхэлж, шилдгүүдээ тодрууллаа. Энэ жил 9-17 насны 80 гаруй харваач хүүхэд 32 сум тавьж, цэц мэргээ сорьсон. Тэд хана харваанд 20, хасаа харваанд 12 сум тавьсан бөгөөд эрэгтэйчүүдээс Баян-Өлгий аймгийн Буянт сумын харьяат Б.Тэнгисболд 30 сум харваж өсөх идэр мэргэн боллоо.

Дэд байрт Хэнтий аймгийн Бор-Өндөр сумын цогцолбор сургуулийн сурагч Д.Мөнхчулуун 29, гутгаарт Завханы Дөрвөлжин сумын Б.Адъяасүрэн 25, дөтгөөр байранд Говь-Алтай аймгийн Баян сумын Б.Ганболд нар 25 оноогоор шалгарсан юм. Өнгөрсөн жилийн хүүхдийн харвааны тэргүүн байрын эзэн Өвөрхангай аймгийн Нарийнтээл сумын Б.Сосорням 24 оноогоор айрагдав.

Эмэгтэйчүүдийн төрөлд өнгөрсөн жил түрүүлсэн Хэнтий аймгийн Бор-Өндөр цогцолбор сургуулийн сурагч Э.Цэндцэсэн 30 оноогоор түрүүлж, амжилтаа бататгасан бол, дэд байрт Төв аймгийн “Мандухай сэцэн” компанийн тамирчин Н.Энэрэл 28, гутгаарт Дорноговь аймгийн I сургуулийн сурагч Э.Биндэръяа 25, дөтгөөрт Дорнод аймгийн I сургуулийн сурагч Х.Солонго 24, тавдугаар байранд Баян-Өлгий аймгийн Буянт сумын Г.Бямбасүрэн 23 оноогоор шалгарчээ.

Энэ жилийн хүүхдийн сур харваанд өмнөх жилүүдийг бодвол харьцангуй олон хүүхэд оролцжээ. Дашрамд дурдахад, энэ сарын 12-нд найм буюу түүнээс доош насныхан цэц мэргээ сорино.

С.ЗАЯА
 

Нийтэлсэн: 2012-07-10 12:44:21
Нийтэд түгээх

АНХААРУУЛГА

Уншигчдын бичсэн сэтгэгдэлд word.mn хариуцлага хүлээхгүй болно. word.mn сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү. Таныг word.mn сайтад зочлон өөрийн санал бодлоо чөлөөтэй илэрхийлж байгаад баярлалаа.

Сэтгэгдэл бичих

Дээш очих

Шар мэдээ

Зохиогчийн эрх хуулиар хамгаалагдсан. Мэдээлэл хуулбарлах хориотой.