Улаанбаатар хотод энэ сарын 10-25-ны хооронд хатуу хөл хорио тогтоох УОК-ын саналыг Засгийн газар дэмжжээ. Засгийн газрын ээлжит бус хуралдаанаас гаргасан шийдвэрийг Ерөнхий сайд Л.Оюун-Эрдэнэ, Шадар сайд С.Амарсайхан, Эрүүл мэндийн сайд С.Энхболд, Сангийн сайд Б.Жавхлан нар танилцуулж байна. Засгийн газрын өнөөдрийн ээлжит бус хуралдаанаар хатуу хөл хорио тогтоосон хугацаанд иргэн бүрд 300 мянган төгрөг олгох шийдвэр гаргажээ. Ерөнхий сайд Л.Оюун-ЭрдэнэОюутолгойн гэрээтэй холбоотой маргаан үүсч, татварын нөхөн төлбөртэй холбоотой асуудлаар Арбитрын маргаан үүсгэсэн. Нэг жилийн хугацаанд нэлээдгүй том ажил болсон. Олон улсын шүүх дээр эхний маргаанаа шийдвэрлүүлж Монгол Улсад орж ирэх байсан татварууд орж ирж байгаа. 2020 оны хоёрдугаар сарын 25-нд Төрийн санд 229.7 тэрбум төгрөг төвлөрсөн. Татварт төлөгдөх ёстой байсан Оюутолгойн мөнгө гэсэн үг. Гуравдугаар сарын 9-нд 419.1 тэрбум, 30-нд 365.5 тэрбум нийт нэг их наяд 26.5 тэрбум төгрөг Төрийн санд төвлөрсөн. Тиймээс Засгийн газар иргэн бүрд 300 мянган төгрөгийн нөхөн төлбөр олгох шийдвэр гаргалаа. Бид хөл хорио тавихгүй үед үүнийг өөр байдлаар зарцуулахаар төлөвлөж байсан гэлээ.

Ерөнхий сайд Л.Оюун-Эрдэнэ БНХАУ-ын Төрийн зөвлөлийн Ерөнхий сайд Ли Көчянтай 2021 оны 04 дүгээр сарын 07-ны өдөр утсаар ярив. Төрийн зөвлөлийн Ерөнхий сайд Ли Көчян Ерөнхий сайд Л.Оюун-Эрдэнэ үүрэгт ажилдаа орсонд нь баяр хүргэж, цаашдын ажилд нь амжилт хүсэв. Ерөнхий сайд нар Монгол, Хятадын Иж бүрэн стратегийн түншлэлийн харилцааг гүнзгийрүүлэх, цар тахлын нөхцөл байдалд хамтын ажиллагааг идэвхжүүлэх боломжийн талаар дэлгэрэнгүй ярилцлаа. Сайн хөршийн харилцаа, харилцан ашигтай хамтын ажиллагааг тогтвортой хөгжүүлэх нь хоёр улсын гадаад бодлогод чухал байр суурь эзэлдэг бөгөөд сүүлийн жилүүдэд хамтын ажиллагаа бүх салбарт идэвхтэй хөгжиж буйд сэтгэл хангалуун байгаагаа талууд онцлон тэмдэглэв. Нөхцөл бүрдсэн үед дээд, өндөр түвшний харилцан айлчлал хийх нь чухал гэдэгт санал нэгдлээ. Ерөнхий сайд нар цар тахлын тархалтыг хязгаарлах, урьдчилан сэргийлэхэд мөн худалдаа, эдийн засгийг аль болох хэвийн явуулахыг зорьж хамтран ажиллахаар тохиролцов. Тухайлбал, хоёр улсын хамтын ажиллагаанд чухал үүрэгтэй хилийн боомтуудын үйл ажиллагааг хэвийн болгох, БНХАУ-аас худалдан авахаар яриа хэлэлцээ хийж буй вакциныг ойрын хугацаанд нийлүүлэх чиглэлээр хамтран ажиллахаар тохиролцлоо.

Засгийн газрын ээлжит хуралдаан 2021 оны 04 дүгээр сарын 07-ны өдөр боллоо. Тавантолгойн нүүрс ачих логистикийн төвийг хоёрдугаар улирлаас барьж эхэлнэ Тавантолгойн нүүрс ачих логистикийн төв /салбар төмөр зам, ачих байгууламж/-ийн Техник, эдийн засгийн үндэслэл, зураг төслийг нь боловсруулан баталгаажуулж, хоёрдугаар улиралд багтаан барьж эхэлнэ. Гашуунсухайт-Ганцмод боомтын хил нэвтрэх цэг, шилжүүлэн ачих байгууламж барих талаар хятадын талтай энэ сард харилцан тохиролцох, боомттой холбоотой асуудлыг Монгол-Хятадын хилийн төмөр замын хэлэлцээр-т энэ онд нэмэлтээр тусгахыг холбогдох сайд нарт даалгав. Протез, ортопедийн болон тусгай хэрэгсэл үйлдвэрлэхийг дэмжинэ Ахмад настан, хөгжлийн бэрхшээлтэй хүний протез, ортопедийн болон тусгай хэрэгслийн үйлдвэрлэлийг дэмжих зорилгоор Дэл Оюу Дөл компанийн Эрхэм чанар протезийн үйлдвэрт тодорхой хэмжээний хөрөнгийг эргэн төлөх нөхцөлтэй олгохоор болов. Эрхэм чанар үйлдвэр нь олон улсын жишиг, стандартад нийцсэн протезийн үйлдвэр, нөхөн сэргээх тусламж, үйлчилгээний сувиллын газартай. Өвчин эмгэг, гэмтэл бэртлээс үүссэн үр дагаврыг арилгах, сэргээн засах, хөдөлгөөн сайжруулах, хүндрэлээс урьдчилан сэргийлэх, протез, ортопедийн хэрэгсэлд дасган сургах зэрэг үйлчилгээ үзүүлдэг. Сүүлийн гурван жилд 3,000 гаруй хүнийг дээд, доод мөчний бүх төрлийн хиймэл эрхтэн, согог засах гутал, хөл, гарын чиг, таяг, сонсголын аппарат болон бусад туслах хэрэгсэлтэй болгосон байна. Санхүүгийн хүнд байдалд орсон үйлдвэртэй Монгол Улсын Ерөнхий сайд У.Хүрэлсүх 2020 оны 04 дүгээр сарын 28-ны өдөр танилцаж, бодлогоор дэмжихээ илэрхийлэн Засгийн газрын хуралдаанаар хэлэлцэж байсан юм. Дээрх асуудлыг өнөөдөр дахин хэлэлцэн шаардагдах хөрөнгийг гаргахаар шийдвэрлэв. Товч мэдээ - 2021 оны 04 дүгээр сарын 06-ны өдөр нийслэлд 36 мянга 412, орон нутагт 50 мянга 371 иргэнийг дархлаажуулснаар улсын хэмжээнд нийт 466 мянга 946 хүнийг дархлаажуулалтад хамруулаад байна. - 2021 оны 04 дүгээр сарын 06-ны байдлаар улсын хэмжээнд 99 тусгаарлах байранд 3,794 хүн байна. Байруудад онцгой байдлын 170, цагдаагийн 201, эрүүл мэндийн 314, нийт 685 алба хаагч, ажилтан ажиллаж байна. - Ажлын байрыг дэмжих зээлийн хүрээнд 346.2 тэрбум төгрөгийг 5,129 зээлдэгч, үүнээс 772 аж ахуйн нэгж, 4,357 иргэнд олгоод байна. Монголбанкны урт хугацаат репо санхүүжилттэй зээлийн хүрээнд 216.2 тэрбум төгрөгийг 1,455 зээлдэгч, үүнээс 1,101 аж ахуйн нэгж, 354 иргэнд олгосон. 2,547 зээлдэгч 190.9 тэрбум төгрөгийн ипотекийн зээл авчээ.

Шадар сайд С.Амарсайхан өөрийн цахим хуудсаар дамжуулан дараахмэдэгдлийгхийжээ. Тэрбээр хүний амь нас юунаас илүү үнэ цэнтэй тул хөдөлгөөний хатуу хязгаарлалт хийж, тархалтыг хумих шаардлага үүсч байна гэв. Хатуу хөл хорио тогтоох эсэх нь одоогоор тодорхойгүй байгаа бөгөөд УОК саналаа Засгийн газарт өргөн барьж, улмаар Засгийн газар хуралдсанаар эцсийн шийдвэр гарах юм.

COVID-19 халдварын нөхцөл байдалтай холбоотойгоорУОК-ын Шуурхай штабын дарга, хурандаа Ц.Ганзоригтой ярилцлаа. -Халдварын нөхцөл байдал хүндэрч байна. Тусгаарлах, эмчлэх байрны хүрэлцээ, хүн хүчтэй холбоотойгоор шуурхай зохицуулалт хийх шаардлага үүслээ? -Сүүлийн өдрүүдэд цар тахлын халдварын батлагдсан тохиолдол эрс нэмэгдэж ойрын хавьтал болон гэрээр тусгаарлан эмчилж байгаа иргэдийн тоо өсч байгаа учраас нөхцөл байдалтай уялдуулж шуурхай шийдвэрлэх асуудал гарч байна. УОК-ын тушаалаар баталсан Тусгаарлан ажиглах үйл ажиллагааг зохицуулах түр журам, Гэр/амрах байр/-ийн тусгаарлалт, ажиглалтын үйл ажиллагааг зохицуулах түр журам-д өөрчлөлт орсон. Тодруулбал, өмнө нь гадаадаас ирж байгаа коронавирусын эсрэг вакцинд хамрагдаагүй иргэдийг тусгаарлах байранд 10 хонуулдаг байсан бол шинэ журмаар долоо хоног болгож бууруулсан. Мөн халдварын батлагдсан тохиолдлын ойрын хавьтлыг өөрийн хүсэлтээр тусгаарлан ажиглах байрны төлбөрийг төлүүлж долоо хонуулахаар болсон. Өөрөөр хэлбэл, тухайн иргэн халдварын ойрын хавьтал болчихлоо гэсэн хүсэлт гаргах юм бол тусгаарлах байрны төлбөрийг төлсөн тохиолдолд тусгаарлах байранд байлгах зохицуулалт шинээр орж ирсэн. Халдвартай иргэнийг эмчлэх, тусламж үйлчилгээ үзүүлж байгаа эмч, эмнэлгийн ажилтан, гадаадаас ирж байгаа иргэдэд үйлчилгээ үзүүлсэн агаарын хөлгийн багынхныг 14 тусгаарладаг байсан бол долоо хоног болгож байгаа. Экипажийн багийн тусгаарлах хугацааг богиносгосноор тусгай үүргийн нислэгийн тоог нэмэгдүүлэх боломжтой гэж харж байна. Мөн Монгол Улсад суугаа дипломат төлөөлөгчийн газрын дипломат ажилтан болон тэдгээрийн гэр бүлийг тухайн улсын дипломат төлөөлөгчийн газарт тусгаарлах бололцоо нөхцлийг бий болголоо. Өмнө нь гадаадын иргэн, дипломат төлөөлөгч болон тэдгээрийн гэр бүлийг зочид буудалд тусгаарлаж байсан. Тусгаарлах байранд байгаа иргэнээс PCR-ийн шинжилгээ авах ажлыг тусгаарлагдсанаас хойш гурав болон зургаа дахь хоногт авна. Нийслэлд ХӨСҮТ-ийн шуурхай хариу арга хэмжээний баг, орон нутагт эрүүл мэндийн байгууллага зохион байгуулна. Харин PCR-ийн шинжилгээний хариуг үндэслэн долоо дахь хоног дээр нь тусгаарлалтаас гаргах юм. Тусгаарлалтад байгаа иргэнээс халдварын шинж тэмдэг илэрсэн бол хугацаа харгалзахгүйгээр PCR-ийн шинжилгээ шуурхай авах ёстой. Гэрээр ажиглах журамд нэлээн өөрчлөлт оруулсан. Гадаад улсаас ирсэн иргэн вакцинд хамрагдаад 14 хоног өнгөрсөн, халдвар аваад эдгэрсэн нотлох баримтыг үндэслэж гэрийн ажиглалтад долоо хоног байлгана. Өөрөөр хэлбэл, энэ шаардлагыг хангаж байгаа гадаадаас татан авсан иргэнийг тусгаарлахгүйгээр онгоцноос буулгаад шууд гэрийг ажиглалтад шилжүүлнэ гэсэн үг. Түүнчлэн тусгаарлах байранд батлагдсан тохиолдол бүртгэгдээгүй бол тухайн цэгт үүрэг гүйцэтгэж байгаа ажилтан алба хаагчийг гэрийн ажиглалтад дөрөв хоног байлгана. -Гадаадаас иргэдээ татан авах ажил хэрхэн үргэлжлэх вэ? -Гадаадаас иргэдээ татан авах төлөвлөгөөний дагуу Токиогоос 158 иргэнээ авчрахаар тусгай үүргийн онгоц ниссэн. Гадаадаас эх орондоо ирж буй эдгээр иргэдийг үндсэн болон төлбөрийн сонголттой есөн буудалд хуваарилж долоо хоног тусгаарлана. Дөрөвдүгээр сарын 1-нд Сөүлээс иргэдээ авчирсан. Энэ ажил үргэлжилж дөрөвдүгээр сард хуваарийн дагуу нийт 12 нислэгээр 2100 орчим иргэнээ татаж авахаар төлөвлөөд байна. Харин Монголд ажиллах нөхцөлтэйгээр болон урилгаар ирж байгаа гадаадын иргэдийн шинжилгээний төлбөрийг ажиллах хүч оруулж ирж байгаа тухайн байгууллага бүрэн хариуцна. -Коронавирусын эсрэг вакцины хоёр тунгаа хийлгэсэн бол яах вэ. Ямар нэг байдлаар шинжилгээ шаардах уу? -Коронавируст халдварын эсрэг вакцины нэг болон хоёр тунг хийлгэснээс хойш 14 хоносон. Халдвар аваад эмчлүүлж эдгэрсэн бол энэ тухайгаа нотлох үүрэгтэй. Үүн дээр үндэслээд PCR-ийн шинжилгээ хийлгэхийг шаардахгүй. Мөн ямар нэг байдлаар тусгаарлахгүй. -Нийслэлчүүд хэсэгчилсэн хязгаарлалтын дэглэмд шилжсэн ч халдварын тоо улам нэмэгдлээ. Халдвартай тэмцэх ямар төлөвлөгөө байна вэ? -Нийслэлчүүд 14 хоногийн хугацаанд улбар шар түвшинд тодорхой цаг, үйл ажиллагааны зохицуулалтыг хийгээд ажиллаж байна. Энэ хугацаанд голомт дагасан өргөтгөсөн судалгаануудыг хийж байгаа. Гудамж талбай албан байгууллагуудаар халдваргүйжүүлэх ажлыг эрчимтэй зохион байгуулахаар төлөвлөсөн. УОК, Засгийн газрын шийдвэрээр улсын хэмжээнд вакцинжуулах ажлыг эрчимжүүлж байна. Өнөөдөр /өчигдөр/ вакинжуулалтын 69 цэгт 35 мянган иргэнийн вакцинжуулахаар төлөвлөж холбогдох байгууллагууд хуваарь гарган ажиллаж байна. Тодруулбал, Чингэлтэй дүүрэгт долоон цэгт 5000 иргэн, Баянголд 11 цэгт 25000, Баянзүрхэд 13 цэгт 6000, Сонгиохайрханд 15 цагт 6250, Хан-Уулд 10 цагт 6700, Сүхбаатарт найман цэгт 4600, Багануур, Багахангайд гурван цэгт 400, Налайхад хоёр цагт 600 иргэнийг дархлаажуулна. Орон нутагт 21 аймагт 110 мянган хүнийг вакцинжуулахаар төлөвлөсний дотор эхний ээлжинд эрүүл мэнд, боловсрол, стратегийн ач холбогдол бүхий байгууллагын ажилтнуудыг хамруулна. Орон нутагт вакинжуулах ажлыг эрчимтэй хийж эхэлсэн. Долдугаар сарын 1 гэхэд вакинжуулалтыг бүрэн дуусгах төлөвлөлт хийн ажиллаж байна. Нийслэлийн Засаг даргын захирамжаар халдварын дархлаажуулалтад худалдаа үйлчилгээ эрхлэгчдийг өргөнөөр хамруулах зорилгоор их дэлгүүр, зах, худалдааны төв, үсчин гоо, сайхны газруудын долоо хоногийн амралтыг энэ сарын 10, 11-ны бямба, ням гаригт байхаар зохион байгуулахаар болсон. Эдгээр газрууд энэ долоо хоногийн амралтын өдөр ажиллахгүй. -Орон нутагт зорчих хязгаарлалттай холбоотойгоор олон нийтэд ойлгомжгүй зүйлс их байна. Тухайлбал, Өмнөговь, Дорноговь зэрэг хилийн боомт бүхий аймгуудыг халдвараас хамгаалах ямар бодлого баримталж байна вэ? -УОК-ын Шуурхай штабаас 119 нэгдсэн мэдээллийн лавлах шугам гаргасан. Өдөрт дунджаар 2500-3000 орчим иргэн хандаж коронавирустай тэмцэхэд авч хэрэгжүүлж байгаа арга хэмжээний талаар мэдээлэл авч байна. Иргэдийн хандаж байгаа мэдээллийг ангилахад шинжилгээний цэгийн байршил, хариу авахтай холбоотой асуулт дийлэнх хувийг эзэлж байна. Мөн вакцинжуулалт, эмнэлгийн тусламж, тусгаарлалт, орон нутгийн хөдөлгөөний зохицуулалтын талаар мэдээлэл хүсч байна. Тухай бүрт нь НОК-ын Шуурхай штаб болон холбогдох байгууллагууд олон нийтийг мэдээлэл, заавар зөвлөмжөөр хангаж байгаа. УОК-оос орон нутаг руу зорчих хөдөлгөөнийг зохицуулж байна. Өргөдөл гомдол цөөнгүй ирж байгаа учраас дахин тодруулж хэлэхэд, Өмнөговь, Дорноговь аймаг руу ачаа тээвэр буюу хүнс шатахуун, эм эмнэлгийн хэрэгсэл, өвс тэжээл, стратегийн зориулалттай үйлдвэр үйлчилгээ уул уурхайн бүтээгдэхүүний тээвэрлэлт хийх. Бүтээн байгуулалтын ээлж солиход УОК-ын Шуурхай штабт хүсэлт гаргаж зөвшөөрөл авч зорчино. Бусад аймаг руу зайлшгүй шаардлагаар зорчих бол тухайн аймгийн онцгой комиссоос зөвшөөрөл авна. Энэ тохиолдолд УОК-ын Шуурхай штабын зөвшөөрөл шаардлагагүй. Хилийн боомт бүхий аймгууд руу зорчихтой холбоотойгоор хэлэхэд БНХАУ-ын талаас коронавируст халдвараас сэргийлэх арга хэмжээний хүрээнд хязгаарлалт хийгээд байгаа. Монголын талаас ямар нэг хязгаарлалт байхгүй. УОК-оос өгсөн үүрэг чиглэлийн дагуу дөрөвдүгээр сарын 6-наас эхлээд УОК-ын Шуурхай штаб Дорноговь аймгийн Замын-Үүд рүү зөвхөн шатахуун, хүнс, буяны ажилд зөвшөөрөл олгоно. Эдгээрээс бусад шалтгаанаар ямар ч зөвшөөрөл олгохгүй гэдгийг анхаарах хэрэгтэй. Энэ хязгаарлалт дөрөвдүгээр сарын 16 хүртэл үргэлжилнэ. Түүнээс хойш бусад ачаа тээвэр хэвийн явагдана. Эх сурвалж: Зууны мэдээ сонин