Орон нутгийн сонгууль олон нэр дэвшигчтэйг хэлэх үү, сонгогдож байвал ороолонтой хүртэл нөхцөхөд бэлэн байгаагаа зарим нэр дэвшигч зарлаад байна. Нийт 19 мянган нэр дэвшигч бүртгэлтэй байгаа орон нутгийн сонгуульд Говь-Алтай аймгийн ИТХ-д Жигмэдийн Дашдаваа гэх эрхэм бие даан нэр дэвшжээ. Амьдрал ахуйг тань өөд нь татна, алаг үрсийг тань амар жимэр амьдруулна гэх нийтлэг ухагдахуун бүхий сонгуулийн сурталчилгаа дундаас Аль ч нам эвсэл, иргэд, бүр чөтгөртэй ч хамтарч ажиллана гэсэн монгол хүний амны билэгт эс багтмаар муу ёрын уриа бодож олоод байгаа Жигмэдийн Дашдаваа гэх энэ эрхэм чухамдаа Говь-Алтайчуудыг голомтоор нь самархаар зэхээд байгаа бололтой. Одоогоор ямар ч шинжлэх ухаан чөтгөр гэж зүйл байдаг эсэхийг нотлоогүй байна. Харин аль ч шашны ойлголтоор бол чөтгөр гэдэг зүйлийг аливаа муу муухайн эх үндсийг таригч хэмээн тодорхойлсон байдаг. Амьдрал ахуйгаа өөд нь татах хэн нэгнийг хайж буй Алтайчууд ад чөтгөртэй нөхцөх дээрээ арай тулаагүй байлтай. Чөтгөр гэдэг үг нь анхаарал татаад байгаагаас биш чухамдаа Аль ч нам, эвсэл, иргэдтэй хамтарч ажиллана гэдэг нь хүртэл логик утгаараа хэнтэй, ямар ч хор найруулахаас сийхгүй гээд байгаа юм биш үү. Сонгуулийн сурталчилгааны хуулинд зүй зохистой үг хэллэг хэрэглэх тухай заалт байдаггүй байлаа гэхэд монгол хүний амны билгийг ингэж харлуулах эрх хэнд ч байдаггүй байлтай. WORD.MN Б.Инжир

Орон нутгийн сонгуулийн өмнө МАН хэд хэдэнээр нь хэлтсийн даргаа сольж шинээр хүн тавьсан. Энэ явдлыг харсан хүмүүс одоогийн генсекийг нь байр сууриа бэхжүүлж байна хэмээн дүгнэж байгаа. Ерөнхийдөө нэг нутаг усны нэг довны хүмүүс нь орж ирсэн. МАН-ын улс төрийн хэлтсийн даргаар хонгор нутгаас угшилтай Д.Дэмбэрэл орсон бол нэгэн үед НХХЯны зөвлөх байсан Энхтүвшин буцаад иржээ. Хэдийгээр дарга нь солигдсон нь ажлын аппарат нь хуучин генсекийн бүрдүүлсэн хүмүүс хэвээр байгаа гэнэ. Шинэ дарга нар нь доороо ажиллах хүмүүсээ өөрсдөө сонгох, өөрийн баг бүрдүүлэх саналыг ил далд тавьсан ч одоохондоо боломжгүй гэсэн хариу сонсжээ. МАН-даа чухал газрын нэг тооцогддог Улс төрийн хэлтэс нь гэхэд л 15 гаруй ажилтантай. Тэд бүгд У.Хүрэлсүхийн үед бүрдсэн хуучны багийн хүмүүс гэнэ. Хэдийгээр тэрээр улс төрөөс гарсан ч түүний бүрдүүлсэн намын ажлын аппаратад одоогоор хэн ч гар хүрээгүй байгаа аж. WORD.MN Б.Бүжүүлэй

Аварга Д.Сумьяабазарын тэргүүлдэг Сонгинохайрхан дүүргийн МАН-ын хороонд урвагчид гарч ирсэн бололтой. Хэн гэдэг нь тодорхой болоогүй ч хийж байгаа хор нь илэрсэн гэнэ. Намын хорооны хэсэг залуус АН-ынхантай сэм уулзаж дүүргийн удирдлагыг хувааж авах талаар шивнээ өрнүүлсэн гэнэ. Ингэхдээ ИХТ-ын даргыг АН-д өгөөд намдаа Засаг даргыг авах нөхцөлтэйгээр тохироо хийж байгаа сурагтай. Ер нь энэ дүүргийн удирдлагыг АН МАН хоёр хэзээнээсээ хоорондоо хуваалцсаар ирсэн. Энэ уламжлал ийнхүү хадгалагдаж байгаа бололтой. Намын хорооны дарга Д.Сумъяабазар энэ явдалд ихэд эмзэглэжээ. Өөрөө дахин санал хураалтанд ороод дээр нь дүүрэгт нэр дэвшигчдийнхээ мөнгийг хүртэл гаргаж байхад хажуугаар урвалт шарвалт гараад уурыг нь хөдөлгөжээ. Тэрээр сонгуулийн өмнө нэр дэвшигчдээрээ хэдэн юм гаргуулах гээд чадаагүй. Арга ядахдаа намын хорооны тэрүүлэгчдээсээ хүн бүр сая төгрөг хандивла гэж шаардсан ч цаадуул нь хөдлөөгүй. Ингээд шаварт унасан шарын эзэн хүчтэй гэгчээр өөрөө л мөнгө хөрөнгө гаргасан ч эцэст урвагчдыг санхүүжүүлсэн болж таарчээ.. WORD.MN Г.Инжир

Орон нутгийн сонгуулийн өмнө МАН хөрөнгө босгох санаатай хэд хэдэн хандивын арга хэмжээ зохиосон. Овоо мөнгө босгох санаатай Бага хурлын бүх гишүүддээ урилга хүргүүлсэн ч цаадуул нь эвтэйхэн сугарч үлдсэн гэнэ. Урилгын үнэ эхлээд 3 сая төгрөг байж. Дараа нь буурсаар нэг саяд хүрсэн ч хөрөнгөтэй мөнгөтэй гишүүдээсээ 100 хүрэхгүй сая төгрөг цуглуусан ч дэндүү чамлалтай байжээ. Орон нутгийн сонгуульд энэ мөнгө юу ч биш нь мэдээж. Бага хурлын гишүүд нь хөөрхөн залиар намаа аргалчихсан гэнэ. УИХ-ын гишүүддээ 3 саяын урилгаа хүргүүлтэл цаадуул нь би аймгийнхаа сум бүрд 2-3 сая төгрөг өгсөн, нийтдээ тавь жаран саяыг зарцуулсан худлаа гэвэл аймгийн намын хорооноос асуугаарай гээд амыг нь таглажээ. Н.Номтойбаяр гишүүн гэхэд л Дорнодын 19 сумын намын хороонд мөнгө өгсөн гэнэ. Бусад гишүүд ч гэсэн ийм маягаар намаа дэмжжээ. Гэтэл хөдөө орон нутгаас мөнгө төгрөг алга, сурталчилгааны унаа тэргэндээ ч шатахуун хийж чадахгүй байна гэсэн хэл ам байнга ирсээр байгаа гэнэ. WORD.MN Г.Инжир

Орон нутгийн сонгуультай холбоотойгоор МАН-ын дарга нарын шүд ихэд өвдөж байгаа гэнэ. Өвчний шалтгаан нь аймгийн намын хорооны дарга нар аж. сонгуульд ялагдаж магадгүй хэдэн нөхөд намын хороог удирдаж байгаа агаад Улаанбаатарт тэднийг яадаг бол хэмээн ихэд сэтгэл түгшин харж сууна. Гол айдас нь сонгуульд ялж чадах болов уу тэгээд ялдаг юм гэхэд аймаг удирдаж хүчрэх болов уу хэмээн шивэр авир хийж байгаа аж. Өмнөговь, Дорноговь гэсэн хоёр аймгийн намын даргыг бодохоор шүд өвддөг болж. Өмнийн говийн намын хорооны дарга Л.Энхболд, Дорноговийн намын хороог удирддаг Д.Энхбат нарын байдал нэлээд хүнд байгаа бололтой. Нутаг усан дахь нэр хүнд, хийсэн ажил явуулж байгаа сурталчилгаа гээд олон талаараа дэн дунтай байна гэнэ. Экс гишүүн Х.Бадамсүрэн л гэхэд орон нутгийн сонгуульд ялж чадахгүй байхаа хэмээн толгой сэгсэрсэн сурагтай. Мань хүний таамаг гомдлоос улбаатай. Өнгөрсөн УИХ-ын сонгуулиар аймгийн намын хороо нь түүнийг бараг дэмжээгүй тул Ажнай Д.Бат-Эрдэнэ тасархай ялалт байгуулсан. Х.Бадамсүрэн хэдийгээр ялагдсанаа хүлээн зөвшөөрдөг ч тийм олон онооны зөрүүтэй ялагдах учиргүй, нэг л но орсон хэмээн ярьж явдаг. Дорноговийн хувьд намын хорооны даргынх нь ганц ар тал болох Сод Монгол-ын Ч.Анандбазар нь нуувчинд орчихсон тул хэцүү л байгаа аж. Д.Энхбат дарга төрсөн эцгээ Хөвсгөл суманд нэр дэвшүүлсэн нь олон нийтэд таалагдаагүй гэнэ. WORD.MN Г.Инжир