​ Монгол Улсын Ерөнхийлөгч У.Хүрэлсүх Уур амьсгалын өөрчлөлтийн асуудлаарх дэлхийн удирдагчдын дээд түвшний уулзалтын Ой, газар ашиглалт сэдэвт арга хэмжээнд оролцов. Монгол Улсын Ерөнхийлөгч У.Хүрэлсүх Британийн Ерөнхий сайд Б.Жонсоны урилгаар Уур амьсгалын өөрчлөлтийн асуудлаарх дэлхийн удирдагчдын дээд түвшний уулзалтын Ой, газар ашиглалт сэдэвт арга хэмжээнд оролцов. Арга хэмжээнд 20 гаруй улсын төрийн тэргүүн оролцож, дэлхийн дулаарлыг 1.5 хэмд тогтоон барих зорилтыг хэрэгжүүлэхэд чиглэсэн бодлого, арга хэмжээ, ахиулан тодорхойлсон амлалт, түншлэл, хамтын ажиллагааны талаар санал солилцлоо. Түүнчлэн ойн хомстлыг бууруулах, ойн сэргээлтийг эрчимжүүлэх нь экосистемийг нөхөн сэргээх хүртээмжтэй аргуудын нэг гэдгийг энэхүү арга хэмжээгээр харуулахыг зорилоо. Арга хэмжээний үеэр Их Британи Улс ой мод, газар ашиглалтын тухай Глазгоугийн удирдагчдын тунхаглал санаачилсныг Ерөнхий сайд Борис Жонсон танилцууллаа. Ойн хомстол, газрын доройтлыг бууруулах хамтын чармайлтад уриалсан эл тунхаглалд нэгдсэн 105 улсын төр, засгийн тэргүүн эв санаа нэгтэй байгаагаа видео мессежээр танилцуулсан бөгөөд Монгол Улс тунхаглалд нэгдэн орсон орны хувьд энэхүү арга хэмжээнд оролцов. Нэг мод тарихад түүнийг дагаж ургах бут, өвс ургамал нийлээд хүлэмжийн хийг шингээж, хөрсний чийгийг хамгаалан, газрын доройтол, цөлжилтөөс сэргийлэхэд хувь нэмэр болно. Харин зуу, мянгаар тоологдох мод тарихад энэ нь тухайн газар нутгийг, сая, тэрбумаар нь таривал бүхэл бүтэн бүс нутгийг эрүүлжүүлэх ач холбогдолтойг Монгол Улсын Ерөнхийлөгч эв нэгдлийн мессеждээ онцлон тэмдэглэв. Уур амьсгалын өөрчлөлтийн асуудлаарх дэлхийн удирдагчдын дээд түвшний уулзалтын эхний өдрийн байдлаар ойн хомстлыг бууруулах, ойг нөхөн сэргээх чиглэлд 100 гаруй улс 19 тэрбум ам.долларын хөрөнгө оруулалт хийхээр амлалт аваад байна.

​ Засгийн газрын ээлжит хуралдаан 2021 оны арваннэгдүгээр сарын 03-нд болж дараах асуудлуудыг хэлэлцэн шийдвэрлэлээ. Шүгэл үлээгчийн эрх зүйн байдлын тухай анхдагч хуулийн төслийг УИХ-д өргөн барина Шүгэл үлээгчийн эрх зүйн байдлын тухай анхдагч хуулийн төслийг хэлэлцээд УИХ-д өргөн мэдүүлэхээр тогтлоо. Төрийн болон хувийн хэвшлийн аж ахуйн нэгж, байгууллагын үйл ажиллагааг шүүмжилсэн, мэдээлсэн, илчилсэн тохиолдолд хууль зүйн хариуцлагад татах, дарамтлахаас мэдээлэгчийг хамгаалах, шүгэл үлээгчдийг аливаа өс хонзон, гэмт хэргийн хохирогч болохоос сэргийлэх эрх зүйн зохицуулалтыг бий болгох үүднээс уг анхдагч хуулийн төслийг боловсруулсан байна. Хуулийн төсөл нь 5 бүлэг, 22 зүйлтэй бөгөөд нийтийн ашиг сонирхлын төлөө шүгэл үлээсэн шүгэл үлээгчийг дэмжих, хамгаалах, урамшуулах, түүний эрх зүйн байдлыг дордуулсан шинжтэй аливаа үйлдлээс урьдчилан сэргийлэхтэй холбогдсон харилцааг зохицуулах юм. Хуулийн төсөлтэй холбогдуулан Гэрч, хохирогчийг хамгаалах тухай хуульд нэмэлт, өөрчлөлт оруулах тухай, Эрүүгийн тухай хуульд нэмэлт оруулах тухай, Зөрчлийн тухай хуульд нэмэлт оруулах тухай, Зөрчил шалган шийдвэрлэх тухай хуульд нэмэлт оруулах тухай зэрэг хуулийн төслийг тус тус боловсруулжээ. Эм, эмнэлгийн хэрэгслийг улсын хилээр нэвтрүүлэх боомтын тоог нэмэгдүүллээ Эм, эмнэлгийн хэрэгслийг улсын хилээр нэвтрүүлэх хилийн боомтыг тогтоох тухай Засгийн газрын тогтоолд нэмэлт орууллаа. Ингэснээр Алтанбулаг, Замын-Үүдээс гадна Гашуунсухайт, Ханги боомтоор эм, эмнэлгийн хэрэгсэл, тэдгээрийн түүхий эдийг татан авах боломжийг нэмэгдүүллээ. Манай улс эм, эмнэлгийн хэрэгсэл, дотоодын үйлдвэрлэлийн түүхий эд, туслах материалыг БНХАУ, ОХУ, БНСУ, БНЭУ-аас импортолдог. БНХАУ-ын Эрээн боомт түр хугацаагаар хаагдсантай холбоотой 2021 оны аравдугаар сарын 28-ны өдрийн байдлаар Эрээн боомтод ханган нийлүүлэх 17 байгууллагын 37 ачаа, Тяньжин боомтод 14 байгууллагын 21 ачаа саатаад байна. Бараа, бүтээгдэхүүний үнийн өсөлт, инфляцтай холбоотойгоор дараах ажил, арга хэмжээг зохион байгуулна Бараа, бүтээгдэхүүний үнийн өсөлт, инфляцид үзүүлэх нөлөөллийн талаар Хүнс, хөдөө аж ахуй, хөнгөн үйлдвэрийн сайд З.Мэндсайхан Засгийн газрын хуралдаанд мэдээлэл хийсэн байна. Үүнтэй холбогдуулан дараах арга хэмжээг авч хэрэгжүүлэхээр болов. Төмс, хүнсний ногооны дотоодын хэрэгцээг хангах зорилгоор механикжсан агуулахыг нийслэлийн өмчид шилжүүлэн авч, удирдлага, менежментийг хариуцан ажиллах: Нийслэлийн хүн амын хүнсний хэрэгцээг хангах зорилгоор 11,12 дугаар сард махны өргөтгөсөн худалдааг хүртээмжтэйгээр 30-аас доошгүй байршилд зохион байгуулах, шуудан хүргэлтийн үйлчилгээг ашиглан айл өрхөд өвлийн идшээ татан авах нөхцөлийг бүрдүүлэх: Хүн амын хаврын хүнсний хэрэгцээнд зориулан махны нөөц бүрдүүлэх, худалдан борлуулах ажлыг зохион байгуулах: Хөдөө аж ахуйн корпораци байгуулах, уг байгууллагаар дамжуулан хүн амын хүнсний хэрэгцээнд зориулан махны нөөц, улаан буудайн нөөц бүрдүүлэх замаар үнийн тогтвортой байдлыг хангах, шаардлагатай санхүүжилтийн эх үүсвэрийг бүрдүүлэх Эрчим хүчний үнэ тарифыг 2022 оны зургадугаар сарын 01 хүртэл нэмэгдүүлэхгүй байх, Хүнсний бүтээгдэхүүн, хүнсний сав баглаа боодол, бусад нэн шаардлагатай бараа, бүтээгдэхүүнийг Гашуунсухайт, Ханги, Бичигт боомтоор нэвтрүүлэн, импортлоход аймгийн мэргэжлийн хяналтын газрын итгэмжлэгдсэн лабораторийг хилийн боомтуудад татан ажиллуулж, шуурхай арга хэмжээ авахыг холбогдох албан тушаалтнуудад даалгалаа. Мөн импортоор оруулж ирэх хүнсний зориулалттай ачааны хагас болон битүү вагоныг гааль, нэмэгдсэн өртгийн албан татвараас чөлөөлөх асуудлаар хуулийн төсөл боловсруулан шийдвэрлүүлэхийг Сангийн сайд болон ЗТХ-ийн сайд нарт үүрэг болголоо. Улаанбуудай худалдан авахад зориулж хөнгөлөлтэй зээл олгоно Эрүүл мэндээ хамгаалж, эдийн засгаа сэргээх 10 их наядын цогц төлөвлөгөө-н дэх хаврын тариалалт, ноолуур, ноос, арьс шир бэлтгэлд зориулагдсан санхүүжилтээс нийт 150 тэрбум төгрөгийг гурил, тэжээлийн үйлдвэрт улаан буудай худалдан авахад зориулан эргэлтийн хөрөнгийн хөнгөлөлттэй зээл олгохоор боллоо. Зээлийг банк, санхүүгийн байгууллагаар дамжуулан 12 хүртэл сарын хугацаатайгаар 3.0 хувийн хүүтэй олгох юм. Одоогийн байдлаар гурилын үйлдвэрүүд 144,6 мян.тн буудай худалдаж авсан бөгөөд нэмэлтээр 141.0 мян.тн, тэжээлийн үйлдвэрлэлд 60,2 мян.тн, нийт 205.1 мян.тн буудай худалдан авах шаардлагатай байна. Зээлийн эх үүсвэрийг шийдвэрлэснээр цар тахлын үед өргөн хэрэглээний бараа, бүтээгдэхүүний хангамж, нийлүүлэлтийг тогтвортой байлгах, үнийг зохистой түвшинд хадгалснаар иргэдийн орлогыг нэмэгдүүлэхэд дэмжлэг үзүүлэх боломж бүрдэж байна. Сүхбаатар хөлөг онгоцыг музей болгоно Хөвсгөл нуураас татан гаргасан Сүхбаатар хөлөг онгоцны хадгалалт, хамгаалалт, аюулгүй байдлыг хангуулах, цаашид аялал жуулчлал, музей болгож ашиглах талаар саналаа танилцуулахыг Байгаль орчин, аялал жуулчлалын сайд болон Хөвсгөл аймгийн Засаг даргад, тус хөлөг онгоцыг татан гаргахад оролцсон алба хаагчдыг урамшуулах асуудлыг шийдвэрлэхийг Батлан хамгаалахын сайдад даалгав. Хөвсгөл нуурын эко системийг хамгаалах, нуурын ёроолын аюултай хог хаягдлыг цэвэрлэх, бохирдлыг бууруулах зорилгоор Хөвсгөл нуурт 1985 онд живсэн Сүхбаатар хөлөг онгоцыг татан гаргах ажиллагааг энэ оны аравдугаар сарын 01-нээс зохион байгуулж байна. Тус ажиллагаанд ОБЕГ, ЗХЖШ, Нийслэлийн болон Орхон, Хөвсгөл аймгийн Онцгой байдлын газар зэрэг байгууллагын 120 гаруй алба хаагч оролцож байна. Товч мэдээ Хөдөлмөр эрхлэлтийг дэмжих сангаас жижиг зээл олгох, түүнд батлан даалт гаргах, хүүг нь нөхөн төлөх, санхүүгийн дэмжлэг үзүүлэх журмыг шинэчлэн баталлаа. Бүгд Найрамдах Турк Улсын Анкара хотноо 2021 оны арваннэгдүгээр сарын 16-нд зохион байгуулагдах Эдийн засаг, худалдааны Монгол Туркийн Засгийн газар хоорондын хамтарсан хорооны есдүгээр хуралдаанд оролцох Монголын талын төлөөлөгчдийн удирдамжийг зөвшөөрлөө. Улаанбаатар 2023 Зүүн Азийн залуучуудын наадмыг зохион байгуулах хорооны бүрэлдэхүүнийг баталлаа. Засгийн газрын Хэвлэл мэдээлэл, олон нийттэй харилцах газар

​ ​ УИХ-ын Эдийн засгийн байнгын хорооны өнөөдрийн хуралдаанаарЖолоочийн даатгалын тухай хуулийн шинэчилсэн найруулгын төсөл болон хамт өргөн мэдүүлсэн хуулийн төслүүдийг хэлэлцэх эсэхийг хэлэлцэж, гишүүдийн 64.3 хувь нь дэмжсэнээр хуулийн төслийг УИХ-ын чуулганы Пүрэв гарагийн хуралдаанд танилцуулахаар боллоо. Хуулийн төсөлтэй холбогдуулан гишүүд санал хэлэв. УИХ-ын гишүүн Ш.АдьшааЖолоочийн даатгалын тухай хуулийг зайлшгүй шинэчилж батлах нь нийгэмд тулгамдсан асуудлын нэг. Төр албан журмаар хэдэн мянган иргэдээсээ хураамж аваад хувийн компаниудыг дэмжих зорилгоор үйл ажиллагаа явуулж байна. Хураамж төлсөн 1.2 сая жолоочийн эрх ашгийн асуудлыг ярих ёстой. Хуулийн төсөл өргөн барьснаас хойш их сонин үйл явдал хэвлэл мэдээллийн хэрэгслээр гарч байна. Энэ нь маш том ашиг сонирхол явж байгааг харуулж байгаа юм. Сайн ажиллаж байгаа хүмүүсийн бизнесийг төр булааж авах гэсэн зорилго байхгүй. Хувийн даатгалын компаниудыг оролцуулах хувилбар ажлын хэсэг яригдахыг үгүйсгэхгүй. Гэхдээ төр нийт иргэнийхээ ашиг сонирхлыг хамгаалах үүргээ хуулийн бодлогоор дамжуулж биелүүлэх ёстой. Даатгалын компаниуд сүүлийн 10 жилийн хугацаанд 230 тэрбум төгрөгийн хураамж авч, 110 тэрбум төгрөгийн хохирол төлсөн байна. Энэ хугацаанд замын хөдөлгөөний аюулгүй байдал, жолоочийн сахилга хариуцлагыг дээшлүүлэх ажлын хүрээнд үр дүн гараагүй гэдгийг хэлэв. УИХ-ын гишүүн Г.АмартүвшинАлбан журмын даатгалын тогтолцоог шинэчлэх нь зөв. Гэхдээ төрийн оролцоог нэмэгдүүлнэ гэдэгт эргэлзэж байна. Одоо мөрдөж байгаа хуулиар албан журмын даатгагчдын холбоо гээд үндсэндээ 25 тэрбум төгрөгийн сан удирддаг байгууллага байгаа юм. 2013-2020 оны есдүгээр сар хүртэл нийт 456 иргэнээс нөхөн олговор олгох хүсэлт авч, 240 иргэнд 554 сая төгрөгийн нөхөн төлбөр олгосон байна. Гэтэл хөрөнгө нь 26 тэрбум төгрөг. Арилжааны банкуудад хөрөнгөө байршуулаад хүүгийн орлого олдог байгууллага. Иргэд нь хохироод байгаа тул энэ сан илүү идэвхтэй байж, нөхөн төлбөрөө гаргаж байх ёстой. Эрүүл мэнд болон нийгмийн даатгал шиг тогтолцоо руу орох вий гэж болгоомжилж байна. Удирдлагууд нь хөрөнгийг нь арилжааны банканд байршуулаад, хүү тохироод, хүүгийн орлогоор ажиллаж байдаг, аль болох зардал гаргахыг хүсдэггүй. Тиймээс хуулийн төслийг бүх талыг сайн сонсож, тэнцвэртэй байдлаар хэлэлцэх нь зөв гэлээ.

​ Цар тахлаас урьдчилан сэргийлэх, тэмцэх, нийгэм, эдийн засагт үзүүлэх сөрөг нөлөөллийг бууруулах тухай хуулийн биелэлтийг сар тутамд нээлттэйгээр хэлэлцэж, хяналт тавих, шаардлагатай бол УИХ-ын холбогдох Байнгын хорооны хуралдаанаар хэлэлцүүлэх, санал, дүгнэлт гаргах үүрэг бүхий Түр хороо /2021.11.02/ хуралджээ. Улсын онцгой комиссын дарга, Монгол Улсын шадар сайд С.Амарсайхан, Эрүүл мэндийн сайд С.Энхболдын мэдээллийг сонслоо. Шадар сайд С.Амарсайхан цар тахлаас урьдчилан сэргийлэх тэмцэх, нийгэм, эдийн засагт үзүүлэх сөрөг нөлөөллийг бууруулах тухай хуулийн хэрэгжилтийн талаар Улсын онцгой комиссоос авч хэрэгжүүлж байгаа арга хэмжээний талаар мэдээллээ. Монгол Улсад коронавируст халдвараар энэ сарын 01-ний байдлаар нийт 592.994 хүн өвчилсөн, зөөвөрлөгдсөн халдвар 666 дотоодын халдвар 592.328 бүртгэгджээ. Эдгэрсэн 577.294 иргэн, клиникт хэвтэн эмчлүүлж буй 16.451 иргэн байна. Нийслэлд 6240 (37.9%), Орон нутагт 10.211 (62.1%) байна. Биеийн байдал нь хөнгөн 7577, хүндэвтэр 6456, хүнд 2058, нэн хүнд 360 иргэн байна гэлээ. Улсын онцгой комиссын дэргэдэх эрдэмтэн судлаачдын тооцооллоор халдварын дэгдэлтийн оргил үе есдүгээр сарын 20-ноос аравдугаар сарын эхэн үед таарсан. Тооцооллоор халдварын тохиолдол аажмаар буурах төлөвтэй. Шинэ хувилбар орж ирэх зэрэг гэнэтийн хүчин зүйл нөлөөлөхгүй бол огцом өсөлт гарахгүй. Харин хөдөлгөөний эрчим өндөр байгаа тул буурах хурд удаан байна гэжээ. Энэ сарын 1-ний өдрийн байдлаар нийслэлийн хэмжээнд зорилтот бүлгийн иргэдийн 104.0 хувь нь нэгдүгээр тунд, 98.9 хувь нь хоёрдугаар тунд, Орон нутагт 88.7 хувь нь нэгдүгээр тунд, 84.0 хувь нь хоёрдугаар тунд тус тус хамрагдсан байна. Улсын хэмжээнд нийт хүн амын 69.3 хувь нь нэгдүгээр тунд, 65.8 хувь нь хоёрдугаар хамрагдсан. 21 хувь нь3-р тунд хамрагджээ. Хүндрэл, нас баралтаас сэргийлэх чиглэлээр ЭМЯ холбогдох мэргэжлийн байгууллагууд дараах арга хэмжээг авч хэрэгжүүлж байна: Цаг үеийн нөхцөл байдал, коронавирусийн эмчилгээнд шинээр нэвтэрч буй эм, тариа, эмчилгээний арга барил зэргээс хамаарч эмнэлзүйн удирдамжид нийт 10 удаагийн өөрчлөлт оруулсан. Уушги судлал, эрчимт эмчилгээ, эх барих, эмэгтэйчүүдийн тусламж үйлчилгээ, хүүхэд, эх барих, эмэгтэйчүүдийн эрчимт эмчилгээ чиглэлээр нарийн мэргэшсэн эмч нараас бүрдсэн эмнэлзүйн зөвлөх баг, дүүрэг, орон нутгийн эмнэлгүүд зөвлөн тусалж байна. Эм, эмнэлгийн хэрэгслийн нөөц бүрдүүлэх, тасалдал үүсэхээс урьдчилан сэргийлэх арга хэмжээг хэрэгжүүлж байна. Түүнчлэн өвчний хүндрэлийн үед эмчилгээнд шаардлагатай Ремдисивир, Тоцилизумаб зэрэг эм, тариаг татан авах, нөөцийг бүрдүүлэхэд анхаарч ажиллаж байна. Батлагдсан тохиолдлуудыг эрэмбэлэн ангилж, хүнд, хүндэвтэр, хүндрэх эрсдэлтэй бүлгийг нэн яаралтай эмнэлэгт хэвтүүлэх ор зохицуулалтын багийг ЭМС-ын тушаалаар байгуулан ажиллаж байна. Түүнчлэн 2010 оноос үйл ажиллагааг нь зогсоож, улмаар 2016 онд татан буулгасан байсан Биобэлдмэлийн үйлдвэр-ийг сэргээж, Засгийн газар, Шадар сайдын зүгээс бүх талын дэмжлэг үзүүлснээр монголчууд дотооддоо цар тахлын эсрэг иммуноглобулин үйлдвэрлэх боломж нээгджээ. Коронавирусийн цар тахлын үед вирусийг дарангуйлах, үрэвслийн хариу урвалыг зогсоох үйлдэлтэй эсрэг биеийг бэлнээр нь шууд бие махбодод оруулж урьдчилан сэргийлж, эмчлэх аргыг ДЭМБ-аас эмнэл зүйн удирдамждаа тусган дэлхий нийтэд хэрэгжүүлж эхэлсэн.Иммуноглобулин гэж нэрлэдэг уургийн бэлдмэлийг хүндэвтэр шатны эмчилгээнд өндөр тунгаар эрт үед хийхэд Ковид-19-ийн халдварын эдгэрэлтийг хурдасган, хүндрэлээс маш сайн сэргийлдэгнь батлагдсан гэв. Эрүүл мэндийн сайд С.Энхболд коронавируст халдвар (КОВИД-19) нөхцөл байдлын ба вакцины дархлаа сэргээх тунгийн явцын талаар мэдээлэв: Коронавируст халдвар (КОВИД-19) дельта хувилбар дэлхийн бүх бүс нутагт давамгайлж байна. Дельта хувилбарын тохиолдол ба нас баралт Зүүн Европ, Их Британид өнгөрсөн 14 хоногт эрс нэмэгдсэн. Дельта хувилбарын дэгдэлтийн үед эмнэлгийн орны ачаалал нэмэгдсэнтэй холбогдуулан эрсдэлт бүлэг буюу хүндрэх эрсдэлтэй иргэдийг эмнэлэгт эрэмбэлэн хэвтүүлэх зорилготой нийслэлийн ор зохицуулалтын багийг ажиллуулж байгаа аж. Долоо хоногийн хугацаанд тандалтаар нийт 2818 хүн ирснээс 1887 хүнийг хэвтүүлсэн. Үүнээс яаралтайгаар 509 хүн, 272 жирэмсэн хүнийг эмнэлэгт эрэмбэлэн ангилж хэвтүүлсэн бөгөөд шаардлагагүй эмнэлэгт хэвтэлт буурчээ. Энэ баг ажиллаж эхэлсний үр дүнд нийслэлд гэрийн нас баралт гараагүй байна. Вакцины дараа тогтсон дархлаа 3-5 сарын дараа буурч байгаа нь мутацлагдсан хувилбарын халдварт өртөх эрсдэлийг нэмэгдүүлж байгаа судалгаанууд гарсан гэлээ. Тиймээс зарим улс орнууд вакцины нэмэлт тунг хийж эхэлжээ. Тухайлбал, Израйльд нэмэлт тун хийлгэсэн 60-аас дээш насны 1.1 сая хүнээс 12 хоногийн дараа 0.1 хувь нь өвчилсөн тохиолдол бүртгэгдсэн байна. Манай улсад нэмэлт тун хийлгэсэн 418,024 хүнээс 14 хоногийн дараа 1 хувь нь өвчилсөн байна. Эдгээр судалгаанаас дүгнэхэд вакцины нэмэлт тунд хамрагдсанаар халдварт өртөх, өртсөн тохиолдолд хүндрэх нас барах эрсдэлээс хамгаалах хувь өссөн байна. Тийм учраас нэмэлт тунд хамрагдалтыг эрчимжүүлэх чиглэлээр анхааран ажиллаж байна гэлээ. Одоо хэрэглэж буй ковид-19 вакцинууд аль нь ч үржих боломжтой вирусийг агуулаагүй нь вакцины дархлаа богино байгаагийн нэг шалтгаан гэж үзэж буй аж. Тиймээс Эрүүл мэндийн сайдын тушаалаар дархлаа сэргээх нэмэлт вакцинжуулалтыг эрчимжүүлэх төлөвлөгөө боловсруулан ажиллаж байгааг сайд дуулгалаа. Сайд нарын мэдээллийн дараа УИХ-ын Х.Болорчулуун, М.Оюунчимэг, Б.Бат-Эрдэнэ, Д.Өнөрболор, Ц.Идэрбат нар асуулт асууж, байр сууриа илэрхийлсэн. Тухайлбал, УИХ-ын гишүүн Х.Болорчулуун, вакцины 1, 2 дугаар тунг хийлгэсэн ч дархлалын үйлчлэл буурч байна гэсэн мэдээлэл байна. Гурав дахь тунгаас гадна дөрөв дэх тунгийн асуудал яригдах уу. Ингэж олон дахин вакцин хийснээр хүний унаган дархлаанд нөлөөлөхгүй юу гэсэн асуулт тавьсан. Эрүүл мэндийн сайд С.Энхболдын хариулснаар, ковидын вакцины бүрэн тун хийлгэснээс хойш 14 хоногийн хугацаанд дархлаа хамгийн өндөр хэмжээнд тогтож, 2, 3 дахь сараас хойш буурч байна гэсэн судалгаа гарсан. Бид дархлааны санамж эсийг сэргээх, дараагийн мутацид орсон хувилбараас сэргийлэхийн тулд 3 дахь тунг эхлүүлсэн. Цаашид дараа дараагийн хувилбар гарах эсэхийг судлаад явж байна. Ямар хэлбэр байх, ямар хурдаар тархах, ямар эмнэл зүйгээр эмчлэхийг одоогоор хэлэх боломжгүй байна. Дельта хувилбар цаашид улирлын томуу шиг дэгдэлт хэлбэрт шилжихийг үгүйсгэх аргагүй. Цаашид жилд нэг удаа хийх вакцин гаргах, эмчилгээг тодорхой болгох талаар эрдэмтэд ажиллаж байгаа юм байна. УИХ-ын гишүүн М.Оюунчимэг, эдийн засаг, нийгмээ бодож байна гээд бүхнийг нээж байгаа ч гэсэн стандартаа хатуу мөрдүүлэхгүй байгаагаас өвчлөл буурахгүй байна гээд хурдтай ажиллах, урьдчилсан анализ хийж, шуурхай арга хэмжээ авахдаа Улсын онцгой комисс анхаарч ажилламаар байна гэлээ. Монгол Улсын Шадар сайд С.Амарсайхан, Монгол Улсын Засгийн газар, Улсын онцгой комисс эрүүл мэнд, эдийн засгийг хамтад нь авч явах уян хатан бодлого баримтлан ажиллаж байна. Өнгөрсөн 5 дугаар сараас хойш хатуу хөл хорио тогтоохгүйгээр хэсэгчилсэн хязгаарлалт явуулах замаар халдварын тархалтаас урьдчилан сэргийлэх арга хэмжээ авч хэрэгжүүлж байна. Гамшгаас хамгаалах өндөржүүлсэн бэлэн байдлын зэрэг-т шилжсэн үед үйл ажиллагаа явуулахыг хориглосон 18 чиглэлээс 4290 аж ахуйн нэгж, байгууллага үйл ажиллагаа явуулж байгаагаас 3662 аж ахуйн нэгж байгууллагатай 2021 оны 10 дугаар сарын 20-ны өдрийн байдлаар Хариуцлагын гэрээ байгуулсан байна. Эдийн засаг, иргэдийн амьжиргаа, бизнесийн үйл ажиллагааг дэмжих зорилгоор нийслэлийн хэмжээнд Хариуцлагын гэрээ-г ресторан, бүх төрлийн баар, кафе, кофе шоп, хоолны газар, амралт, жуулчны бааз, дэн буудал, саун, бассейн, фитнесс, тоглоомын газар, кино театр зэрэг нийт 2,563 ААНБ-тай байгуулж, халдвар хамгааллын дэглэмийг сахиулан үйл ажиллагаа явуулахыг зөвшөөрсөн гэсэн хариултыг өгсөн. УИХ-ын гишүүн Д.Өнөрболор, ковидоор өвчилсний дараа биед үлдэх урхгаас сэргийлэх зорилгоор нөхөн сэргээх асуудалд дэлхийн улс орнууд анхаарч байгааг дурдаад, нөхөн сэргээх үйл ажиллагааг улс орны хэмжээнд өрнүүлэх бодлогын ямар зохицуулалт арга хэмжээ авч байгаа вэ гэсэн асуулт тавьсан. Эрүүл мэндийн сайд С.Энхболд, Ковидоор өвдөөд эдгэсний дараа хүний биед 64 төрлийн хам шинж илэрч байгаа. Ядрах сульдах, толгой өвдөх, цээжээр хөндүүрлэх шинж тэмдэг голдуу илэрч байна. Бид эмчилгээ, оношилгооны удирдамжийг шинээр гарган эмнэлгүүдэд нэвтрүүлэх, эмч, эмнэлгийн ажилтнуудад сургалт зохион байгуулахаар төлөвлөгөөний дагуу ажиллаж байна гэлээ. Эцэст нь Түр хорооноос Засгийн газарт Коронавируст халдвар /КОВИД-19/-ын цар тахлын улмаас үүсээд буй цаг үеийн нөхцөл байдлыг шийдвэрлэх талаар тодорхой арга хэмжээ авах үүрэг, чиглэл өглөө хэмээн УИХ-ын Хэвлэл мэдээлэл, олон нийттэй харилцах хэлтсээс мэдээллээ.

​ Уур амьсгалын өөрчлөлтийн асуудлаарх дэлхийн удирдагчдын дээд түвшний уулзалтад оролцож байгаа Монгол Улсын Ерөнхийлөгч У.Хүрэлсүхэд Япон Улсын Ерөнхий сайд Фүмио Кишида бараалхлаа. Япон Улсын Ерөнхий сайдаар томилогдсонд нь Ерөнхийлөгч У.Хүрэлсүх баяр хүргэв. Фүмио Кишида мөн Монгол Улсын Ерөнхийлөгчөөр сонгогдсонд нь баяр хүргэлээ. Ерөнхий сайд Монгол-Японы харилцаа, хамтын ажиллагааг өргөжүүлэн хөгжүүлэх чиглэлээр Ерөнхийлөгч У.Хүрэлсүхтэй нягт хамтран ажиллахаа нотлон илэрхийлсэн байна.