Ерөнхий сайд Н.Алтанхуяг ТЕГ-ын дэд даргаар Д.Ариунсанг томилсон шийдвэрээ огцрох асуудал нь яригдахаас нэг хоногийн өмнө цуцалжээ. Энэ нь хоёрдахь удаагаа болж байгаа гэнэ. Өмнө нь үүрэг гүйцэтгэгч нарыг томилсон нь хууль бус болсон тухай яригдахад бас л шийдвэрээ цуцалсан. Энэ бүхнээс үзэхэд Ерөнхий сайдын томилгоо ерөөсөө хуулийн хүрээнд явагдадгүй бололтой. Ямар нэгэн даргыг томилохдоо хууль журмыг нь дагахаасаа илүү зөрчдөг болж. Хуулиа мэдэхгүйдээ биш харин мэдэхийн дээдээр мэдэж байгаадаа ингэж аашилдаг гэнэ. ТЕГ-ын дэд даргаар гүйцэтгэх ажлын мэргэжилтэй дадлага туршлагатай хүнийг томилохын оронд намынхаа яруу найрагчыг зүтгүүлээд өөрөө огцрох тухай яриа дэгдэнгүүт л захирамжаа цуцалсан. Энэ янзаараа дөрвөн жилийг өнгөрөөх юм бол цуцалсан захирамж хүчинтэйгээсээ хамаагүй олныг үйлдвэрлэх бололтой.

НИТХ-ын Тэргүүлэгчдийн хуралдаан 10.00 цагт нийслэлийн Засаг даргын тамгын газрын А танхимд болно. Хуралдаанаар нийслэлийн гудамж, замын хөдөлгөөнд ачааны автомашин цагийн хязгаарлалттайгаар оролцуулах түр зөвшөөрөл олгох журам батлах тухай, НИТХ-ын ээлжит хуралдааныг товлон зарлах тухай зэрэг асуудлыг хэлэлцэх юм байна. Нийслэлийн толгойны өвчин болсон замын түгжрэлийг өнгөрсөн оноос эхлэн автомашины дугаарын хязгаарлалт, амралтын өдөр тэгш, сондгой тоогоор төгссөн автомашиныг хязгаарласнаар замын хөдөлгөөний түгжрэл саарч байгаа гэдгийг албаныхан хэлж байгаа юм. Тиймээс замын хөдөлгөөнд ачааны автомашиныг цагийн хязгаарлалттай явуулах нь замын түгжрэл, даацад нөлөөлнө гэж албаныхан үзэж байгаа юм байна.

МҮОХ-ны ерөнхийлөгч Д.Загдсүрэнг батлан даалтаар суллажээ. Тэрээ тамирчдад зориулсан мөнгийг хувьдаа ашигласан, МҮОХ-ны газрыг бусдад хууль бусаар өгсөн хэрэгр сэжиглэгдэн сар гаруй Ганц худагт хоригдсон. Тэгвэл хэн түүнд батлан даалт гаргасан нь сонирхол татаж байна. Ерөнхийлөгч хүнийг түүнээс өндөр дээд албан тушаалын хүн л батлан дааж таараа. Тэр хүн нь хүчний байгууллагд их нөлөөтэй байж таарах гээд байна даа.

УИХ-ын гишүүн байхдаа хамгийн шудрага үнэнчийн дүрийг эсгэдэг байсан Л.Гүндалай гишүүнээсээ буугаад жинхэнэ дүр төрхөө таниулж эхэлжээ. Тэрээр жирийн иргэнд эрэлхэн бяралхаж сүрийг үзүүлэн газрыг нь булаах гэсэн гэнэ. Зайсанд буюу Богд уулын аманд хажуу хавиргынхаа айлыг ад үзээд хөөж туугаад байгаа экс гишүүнийг газрын хэлэлцүүлгийн үеэр иргэд ГХ-ны сайд тойргийнхоо төлөөлөл болох Л.Болдод гомдол мэдүүлжээ. Гэсэн ч олигтой юм болно гэж хүлээх хэрэггүй бололтой. Хан-Уул дүүргээс сонгогдсон Л.Болд, Ц.Оюунгэрэл хоёр даварсан Л.Гүндалайг зогсоож чадах нь юу л бол. Бараг хэлж ярих ч үгүй биз. Харин ч чи тэр уулын амаа авдгаараа ав наад айлуудаа хөөнө үү байна уу бидэнд хамаагүй гэх байх даа. Томчууд хэзээнээс цаагуураа бие биенээ дэмжиж явдаг хойно.

Ардын нам арга ядсан тактикт шилжжээ. Эрх баригчидтай ил цагаан тэмцэж чадахаа больсон уу яасан Засгийн газрыг эсэргүүцсэн бүхнийг эргэж тойрч өдөж хатгаж явдаг болж. 100 мянган айлын орон сууц хөтөлбөрийн хохирогчид талбайд жагсаад байсныг генсек Г.Занданшатар, нарийн бичгийн дарга Ж.Сүхбаатар нар очиж уулзан санал шаардлагыг эелдэгээр сонсож ард түмнээ гудамжинд гаргах шахсан Засгийн газрыг муулжээ. Мөн тэмцлээ хурцатга, зоригтой бай гэж хатган тэднээр могой бариулах гэжээ. Ардын нам ард түмэнтэйгээ хамт гэдгээ ийнхүү харууллаа . Хэрвээ Засгийн газрыг эсэргүүцэх гэж байгаа бол асуудал нь ямар ч байсан хамаагүй тэднийг МАН уухайн тас дэмжих бололтой.