Өнөөдөр 3 дугаар сарын 25. Амар тайван амьдрахуйн зурлага-д Бодь сэтгэлийг чухалчлах үүднээс бидний ухамсарлаж буй оюун санаа нь онцгой маягийн оюун санаа хийгээд түүний тасралтгүй чанарыг харгалзан үзвэл мөнх бөлгөө. Өөр ямар ч оюун санаа ийм байж чадахгүй хэмээн Дээрхийн гэгээн XIV Далай лам Данзанжамц айлджээ. Далай багшийн хэлсэн энэ онцгой маягийн оюун санааг түүний 9 боть бүтээлийг орчуулж бидний гар дээр тавиад буй зохиолч, орчуулагч О.Чинбаяртай холбож хэлмээр санагдана. Сайхан орчуулгатай зохиол унших ч ай даа бас, бүх орцыг нь тааруулж хийцлэн, галыг нь тааруулж өрдөж чанасан ээжийн цай шиг аагтай, амттай байдагсан. О.Чинбаярын орчуулгын бүтээлүүд өнөө цагт яг л тийм сайхан цайны амтыг санагдуулам часхийж онцгойрч байгаа. Дээрхийн гэгээнтэнтэй хоёронтоо уулзаж байсан тэрээр Далай багшийн 9 боть номыг хэвлүүлэн гаргажээ. Хамгийн хөнгөн цаасан дээр хэвлэж, бэлгийн багц болгож савласан энэхүү нандин бүтээлийг найман настай хүүхдээс эхлээд 80 настай буурлуудад хүртэл бэлэглэж, хүндэтгэлийн дээд болгон өргөн барьж баймаар сайхан хийцтэй, сайн бүтээл болсон байна.

Сэтгүүлч, судлаач Бадам-Очирын Галаарид бөө мөргөл, тэнгэр шүтлэг, уламжлалт ёс заншлын талаар үнэгүй лекц уншина. Мөнх тэнгэрийн ухаан нэртэй энэхүү лекц нь Монголын уламжлалт гүн ухаан, тэнгэр шүтлэгийн мөн чанарыг олон нийтэд таниулж, шинээр сэргэж буй бөө мөргөлийг зөв голдиролд нь оруулах, аль ч шашныг хүндэтгэн үзэж эв эеийг эрхэмлэдэг Монгол төрийн уламжлалт бодлогыг таниулах зорилготой аж. Судлаач Б.Галаарид гоц үзэгдэл, парапсихологийн чиглэлээр Онгод тэнгэрийн зараалаар, Парапсихологийн унших бичиг, Нууц ертөнцийн тухай өгүүллүүд, Бөө мөргөлийн тухай бичвэрүүд зэрэг ном бичиж, Бөө мөргөл тэнгэр шүтлэг, Ид шид, гоц мэдрэхүй, Лам хувраг, төөрөг зурхай,Далд ертөнцийн ил үнэн, Тэнгэризм ба монголчууд, Мөнх тэнгэрийн ухаан зэрэг бүтээлүүдийг эмхэтгэж, К.Филимоновын Нууц ертөнцийн тэмдэглэлүүд, Үл танихуйн хил гатлахуй, Нострадамустай ханьссан түүх, П.Одинцовын Бид бүгдээрээ зомби, Илья Чусовын Физикч-гоц мэдрэхүйтний тэмдэглэлүүд мөн гадаадын гоц мэдрэхүйтнүүдийн тухай,Далд ухамсрыг нээхүйн ухаан номыг орчуулан гаргасан, энэ салбартаа нэр хүнд бүхий судлаач юм. Хорь гаруй жилийн судалгааны ажлын явцад олж мэдсэнээ олон нийтэд хүргэх Мөнх тэнгэрийн ухаан лекц 2013 оны 3 сарын 23-ны бямба гаригийн 12 цагаас Монголын Үйлдвэрчний Эвлэлийн соёлын ордонд болно.

Японд болж буй Mersedes Benz Fashion Tokyo загварын 7 хоногт дизайнер С.Ариунаа ARIUNAA SURI брэндээ хэрхэн толилуулсаныг та бүхэнд хүргэж байна. Энэхүү шоунд дэлхийн хэмжээний 50 орчим дизайнер загвараа дэлгэх бөгөөд С.Ариунаагийн хувьд 40 орчим коллекцийн 170 гаруй загвараараа оролцож байна. Монгол брэнд бий болгох талаар ид шуугиж буй энэ үед монгол дизайнерүүдийн бүтээсэн брэндүүд дэлхийд зөвшөөрөгдөж байгаа нь үнэлүүштэй хэрэг болоод байна. WORD.MN Б.Бүжүүлэй

Өнгөрсөн оны онцлох уран бүтээлүүдийн нэг ТВ коктейль хамтлагийн Хоёр ертөнцийн буудал жүжиг драмын урлагийн дээд шагнал Гэгээн муза X наадмын шилдэг эрэгтэй, эмэгтэй гол дүр, шилдэг найруулагч, хөгжмийн зохиолч гэсэн нийт зургаан номинацид нэр дэвшээд байгаа. Телевизийн хошигнол, дэлгэцийн бүтээлүүдээр дагнан ажилладаг ТВ коктейль хамтлаг стиль жанраа эрс өөрчлөн, драмын урлагт хөл тавьсанаа нийгмийн сэтгэл зүйд өөрсдийн оролцоог нэмэрлэсэн юм. Тиймээс уг драмын жүжгийн тасалбар эрэлт ихтэй байсан ба хэд хэдэн удаа тоглолтын товоо сунган үзэгчдэд хүрсэн ч дахин үзэх хүсэлт ТВ коктейль хамтлагийнханд байнга ирдэг байжээ. Үнэхээр ч уран бүтээлээрээ өдөр ирэх тусам өсөн дэвшиж яваа тэдний дуу хоолой хүрэх ёстой газраа хүрч очин, үзэгч ажиглагчдаас өндөр үнэлгээ авсаны тод жишээ энэ бол уу. Улиг болсон хайр сэтгэл, хар хорон санаа мэтээр үзэгчдэдээ залхаахын оронд үхэл амьдралын үнэ цэнэ, утга учрын тухай хүн төрөлхтөний хувьд мөнхийн сэдвүүдээр аялуулж чадсан Хоёр ертөнцийн буудал жүжиг өмнө нь хоёр театрын боломж бололцооноос шалтгаалан 20-хон удаа тоглогдоод өнгөрч байсан. Тэгвэл үзэхээр төлөвлөчихөөд амжаагүй үлдсэн хүмүүст аминчлан сануулахад Ж.Сэнгэдорж найруулагчийн Хоёр ертөнцийн буудал сонгодог драмын жүжиг Гэгээн муза наадмын хүрээнд энэ сарын 22-ны үдэш 19.00 цагаас УДЭТ-т ганцхан удаа тоглогдохоор болжээ. Г.ДАША

DOZ entertainmentынхан дахин гадаадын уран бүтээлчидтэй хамтран Дүүлэн нис нэртэй түүхэн киног бүтээжээ. Энэ сарын 7-нд Тэнгис кино театрт нээлтээ хийсэн Дүүлэн нис түүхэн кино өдөр бүр Тэнгис, Өргөө кино театруудаар гарч байна. Уг киноны зохиолыг Ш.Доржсүрэн, Э.Мөнгөнхүү нар бичиж, ерөнхий найруулагчаар DOZ entertainmentын найруулагч Ш.Доржсүрэн ажиллаж, гадны зураглаачид хамтарсан бөгөөд гол дүрд жүжигчин А.Мөнгөнзул, Пан Ин Хаэ, Кан Таэ Юёон, Лэ Наэ Шин, Ким Сун Ах нар тоглосон байна. DOZ entertainmentын энэ удаагийн кино багт Итали, Солонгос, Энэтхэг, Аргентины уран бүтээлчид хамтарсан бөгөөд Өмнөд Солонгосын жүжигчдийг тоглуулжээ. Энэ киноны түүхэн хэсгийн зураг авалтыг Солонгосын баруун урд эргийн Нажу хэмээх хотын ойролцоо Солонгос улсын кино хорооны павилонд хийсэн бөгөөд нийт таван өдрийн хугацаа зарцуулжээ. Сонирхуулхад, энэ павилон нь зөвхөн Хааны ордны хэсэг нь гэхэд 100 гаруй өрөөтэй төдийгүй гадна талдаа эртний сүрлэн дээвэртэй тариачдын байшингаас эхлээд МЭ-ний X зуунаас ХХ зуун хүртлэх бүхий л цаг үеийн тухай өгүүлэх кино зураг авч болохуйцаар барьж байгуулсан, нэг уулын амыг бүрэн эзэлсэн маш том байгууламж аж