Монголын соёл, урлагийн салбарын ууган байгууллагууд болох Улсын драмын эрдмийн театр, Дуурь бүжгийн эрдмийн театр, Үндэсний номын сангаас маргааш буюу 10 дугаар сарын 10-ны 11:00 цагт УДБЭТ-д хэвлэлийн хурал хийх болсон тухай зарлажээ. Хэвлэлийн хурлаар тус байгууллагуудын хөрөнгө оруулалт, бүтээн байгуулалтын ажлуудыг зогсоох болсон тухай салбарын сайдын хийсэн мэдэгдэлтэй холбогдуулан мэдээлэл хийх юм. Хэвлэлийн хуралд тус байгууллагуудын удирдлагууд болон уран бүтээлчид, ажилчид оролцох аж. Иймд хэвлэл мэдээллийн байгууллагууд, сэтгүүлчид та бүхнийг урьж байна. Хурлын талаарх дэлгэрэнгүй мэдээллийг 99026929, 99194570, 99122446 дугааруудаас лавлаарай.

Нийслэлийн Засаг дарга бөгөөд Улаанбаатар хотын Захирагч С.Амарсайханы үүрэг болгосны дагуу Сүхбаатар дүүргийн 1 дүгээр хороо, Хүнсний 20-ын урд талын нүхэн гарцыг шинэчлэн засварласан. Нүхэн гарцын засвар, шинэчлэлийн ажлыг Төр, хувийн хэвшлийн түншлэлээр дөрөвдүгээр сарын 25-наас зургаадугаар сарын 25-ны хооронд Улаанбаатар хотын Захирагчийн ажлын алба, Элитконстракшн ХХК хамтран хийж гүйцэтгэж, ашиглалтад оруулсан билээ. Нүхэн гарцыг шинээр засч ашиглалтад оруулснаас хойш энэ байдал үгүй болж, хувь хүмүүс, олон нийтийн байгууллага зүй зохистойгоор ашиглаж эхэлсэн байна. Тодруулбал, хоёр жилд нэг удаа зохион байгуулагддаг Ulaanbaatar public art week арга хэмжээний хүрээнд гаргаж байгаа зураач Э.Есүнгэний No mad баримтат гэрэл зургийн үзэсгэлэнг энэхүү нүхэн гарцанд дэлгэж иргэд, олон нийтийн хүртээл болгоод байна. Гэрэл зурагт Улаанбаатар хотын өнөөгийн нийгмийн аж байдлыг харуулжээ. Ингэхдээ Баянхошууны зун гэрэл зургаар гэр хорооллын нэгэн айлын хашаанд зун ямар налгар, тайван, гэр бүлээрээ аз жаргалтайгаар өнгөрдгийг, Гурвал зургаар энгийн, тайван оршихуй айл гэрийн элгэмсүү байдлаар харагддаг гэдгийг нүдэнд харагдаж, сэтгэлд буухаар гэрэл зургийн хальсанаа буулгаснаараа онцлог аж. Анх 1988 онд энэхүү нүхэн гарцыг барьж байсан ч өдийг хүртэл засвар үйлчилгээ огт хийгээгүй, таазнаас нь ус шүүрдэг, ус зайлуулах худгийн шахуурга ажиллагаагүй болсон, оройн цагаар зорчих хэсэг гэрэлтүүлэггүй, худалдаа, үйлчилгээ эрхлэх зориулалтгүй атал иргэд зөвшөөрөлгүйгээр үйл ажиллагаа явуулж байсан бол өдгөө ийнхүү нийгэмд эерэг хандлага түгээх, олон нийтийн үйл ажиллагаа зохиох, уран бүтээлчид үзэсгэлэнгээ дэлгэж, их хотын иргэд, оршин суугчдад хотын соёлыг түгээж, гоо зүйн боловсрол олгох зэрэг олон өгөөжтэй арга хэмжээнүүдийг зохион байгуулдаг болоод байна. Нийслэлийн ЗДТГ-ын Хэвлэл мэдээлэлтэй харилцах хэлтэс

Шинэлэг бүхнийг сэдэгч Камертон хамтлагийн ахлагч, Төрийн соёрхолт дуучин, Voice of Mongolia шоуны шүүгч, дуучин Д.Болд өөрийн 440Hz records-ын албан ёсны нээлтээ хийж, хөгжимд дурлагч залуустаа гайхалтай уран бүтээлүүдийг хүргэхээр зэхжээ. Түүний 440Hz records-ын нэрнийн утгыг тайлбал, хөгжмийн ля нот хамгийн цэвэр, тунгалаг дуугардаг. Өөрөөр хэлбэл, 440 герцээр хэлбэлзэж дуугардаг гэсэн үг юм. Уран бүтээлээ цэвэр тунгалаг өнгөөр сонсогчдоо хүргэхийг гол зорилгоо болгон энэхүү нэрийг хайрласан байна. Тун удахгүй дуучин Д.Болдын шинэ уран бүтээл хүрэхээс гадна Voice of Mongolia шоунд түүний багт байсан дуучдын хэн ч, хаана ч сонсож байгаагүй гайхалтай дуунууд олны хүртээл болно. Одоогоос 13 жилийн өмнө дуучин Болд өөрийн B Production-ыг үүсгэн байгуулж, хэд хэдэн авъяаслаг уран бүтээлчдийг хөгжүүлэн олны танил болгосон билээ. Тухайлбал, дуучин Маралжингоо, Эгшиглэн, Агиймаа, Гурван охин хамтлаг, Бид4 хамтлаг, Шоо хамтлаг /Опозит/ нарын уран бүтээлийг сонсдоггүй залуус гэж үгүй. Тэдний дуулсан уран бүтээл болгон нь хит болдог гэдгийг уншигчид андахгүй мэднэ. Тэгвэл энэ удаад түүний тэсрэлт хийж олны танил болгох шинэ уран бүтээлчдийгтанилцуулж байна. Ариунжаргал Бүжинхлам Идэрмаа Ганбилэг

Нийслэлийн түүхт 380 жилийн ойг тохиолдуулан мэргэжлийн урлагийн байгууллагууд дүүргүүдийн төв талбайд тоглолтоо хийх гэж байна. Үүний эхлэл болж маргааш буюу 10 дугаар сарын 5-ны бямба гарагт Үндэсний урлагийн их театр алслагдсан дүүргийн иргэдэд зориулж Налайх дүүргийн төв талбайд бүрэн хэмжээний тоглолтоо хийх юм. Энэ үеэр Налайх дүүргийн төр захиргааны, хувийн хэвшлийн болон, төрийн бус байгууллагууд 11-18 цагийн хооронд дүүргийн төв талбайд нээлттэй өдөрлөг зохион байгуулна. Нийслэлийн Соёл Урлагийн газар

Нийслэлийн Засаг даргын зөвлөлийн өнөөдрийн хуралдаанаар Нийслэлийн эдийн засаг, нийгмийг 2020 онд хөгжүүлэх үндсэн чиглэлийн төслийг хэлэлцээд НИТХ-д өргөн барихыг дэмжлээ. Эдийн засгийн өсөлт өрх бүрт, Хот байгуулалт, дэд бүтэц, Байгаль орчин, ногоон хөгжил, Нийгмийн хөгжил , Засаглал гэсэн 5 бүлгийн 26 зорилтын хүрээнд нийт 485 арга хэмжээ хэрэгжүүлэхээр төлөвлөжээ. Эдгээр арга хэмжээг хэрэгжүүлэхэд нийт 1 их наяд 496 тэрбум 250 сая төгрөгийн санхүүгийн эх үүсвэр шаардлагатайг Нийслэлийн Хөгжлийн бодлогын асуудал хариуцсан нэгдүгээр орлогч Ж.Батбаясгалан танилцууллаа. Нийслэл Улаанбаатар хотын эдийн засгийг төрөлжүүлэн хөгжүүлэх, үйлдвэрлэл, бүтээмж, ажлын байрыг нэмэгдүүлэх үүднээс үйлдвэрлэл, технологийн паркуудыг байгуулан ажиллуулах нь Эдийн засгийн өсөлт өрх бүрт бүлгийн гол зорилт юм. Паркуудын бүтээн байгуулалтын төслийн бэлтгэл ажлыг ханган, нийслэлийн төсвийн хөрөнгөөр хэрэгжүүлж буй дэд бүтцийн ажлыг үргэлжлүүлэн ашиглалтад оруулна. Улаанбаатар хотод бизнес эрхлэхэд таатай орчныг бүрдүүлж, төр хувийн хэвшлийн түншлэлийн зарчимд тулгуурласан цаашдын хамтын ажиллагааг бий болгоно. Хот байгуулалт, дэд бүтцийг хөгжүүлэх ажлын хүрээнд хотын хэт төвлөрлийг задалж, нэг төвөөс олон төвт суурьшлын зохистой тогтолцоонд суурилсан хотыг байгуулна. Уг зорилтын хүрээнд Сэлбэ, Баянхошуу дэд төвүүдэд баригдаж буй нийгмийн болон инженерийн дэд бүтцийн барилга байгууламжийн угсралтын ажлыг бүрэн дуусгаж, ашиглалтад оруулан, Дэнжийн мянга, Дамбадаржаа, Толгойт, Шархад дэд төвүүдийн дэд бүтцийн барилга угсралтын ажлуудыг эхлүүлнэ. Төвлөрсөн шугам сүлжээнд холбогдох боломжгүй гэр хорооллын дундын бүсэд Дэд бүтцийн төв-ийн төслийг 2 байршилд хэрэгжүүлж, 400 гаруй айл өрхийг инженерийн шугам сүлжээнд холбоно. Байгал орчин, ногоон хөгжлийн бодлогын хүрээнд сайжруулсан түлш нөөцлөх, түгээх борлуулалтын цэгийг Сүхбаатар дүүрэгт байгуулж, үйл ажиллагааг жигдрүүлж, сайжруулна. Шөнийн цахилгаан, эрчим хүчний хөнгөлөлтөд гэр хорооллын 150 мянган айл өрхийг хамруулна. Нийслэлийн агаарын чанарыг сайжруулах бүс, түүнд мөрдөх журам-ыг шинэчлэн тогтоож, агаарын чанарыг сайжруулах бүсэд агаар бохирдуулагч эх үүсвэр ашиглан үйлдвэрлэл, үйлчилгээ эрхэлж байгаа аж ахуйн нэгж, байгууллагад хяналт шалгалт хийж, бүсийн дэглэм мөрдүүлнэ. Нийгмийн хөгжлийн бодлогын хүрээнд нийслэлийн хүн амын өсөлттэй уялдуулан, нийгмийн хамгаалал, үйлчилгээний дэд бүтцийг сайжруулж, иргэн бүр эрүүл, боловсролтой, ажилтай орлоготой, амар тайван амьдрах нөхцлийг бүрдүүлнэ. 2020 онд он дамжин хэрэгжих улсын төсвийн 19, шинээр 3 сургууль, Азийн хөгжлийн банкны хөнгөлөлттэй зээлээр 2, БНХАУ-ын Засгийн газрын буцалтгүй тусламжаар 3, Японы Засгийн газрын буцалтгүй тусламжаар 4 сургууль барина. Ингэснээр 19 мянга 310 хүүхдийн суудал бүхий 35 сургуулийн барилгын ажил эхэлнэ. Мөн цэцэрлэгийн хүртээмжийг нэмэгдүүлж, сургуулийн өмнөх насны хүүхдийг боловсролд тэгш хамруулах Жаргалтай үрс төсөл хэрэгжинэ. Орон сууц, гэр хорооллын дунд спорт тоглоомын талбай байгуулж, хүүхэд залууст чөлөөт цагаа зөв боловсон өнгөрүүлэх эрүүл орчинг бий болгоно. Дүүргийн нэгдсэн эмнэлэг, Эрүүл мэндийн төвийн тархины цус харвалт, зүрхний шигдээсийн дараах сэргээн засах тусламж үйлчилгээг хөгжүүлэх ажлын хүрээнд дүүргүүд сэргээн засах иж бүрэн тоног төхөөрөмжөөр хангагдана. Засаглалын зорилтын хүрээнд нийслэлийн нутгийн захиргааны байгууллагуудаас үзүүлж байгаа төрийн үйлчилгээнд шинэ менежмент нэвтрүүлэх, мэдээллийн технологийн ухаалаг шийдлүүдийг ашиглах, төрийн албан хаагчийн мэдлэг ур чадварыг нэмэгдүүлэх, хариуцлагыг дээшлүүлэх замаар төрийн үйлчилгээг иргэдэд шуурхай, тэгш, нээлттэй хүргэнэ. Нийслэлийн нутгийн захиргааны байгууллагуудын үзүүлж байгаа төрийн үйлчилгээнд шинэчлэл хийж, зохион байгуулалтын арга хэмжээ авах замаар төрийн үйлчилгээг операторын горимд шилжүүлнэ. Нийслэлийн эдийн засаг, нийгмийг 2020 онд хөгжүүлэх үндсэн чиглэлийн төслийг хэлэлцэх үеэр Нийслэлийн Засаг даргын зөвлөлийн гишүүд саналаа хэллээ. Тухайлбал, Нийслэлийн Хүний хөгжил, нийгмийн бодлогын асуудал хариуцсан орлогч Ш.Анхмаа хэлэхдээ Газрын алба жил бүр газар зохион байгуулалтын төлөвлөгөөг дутуу хийдэг. Улсын төсөвт газрын асуудлыг нь шийдвэрлээгүй сургууль, цэцэрлэг, эмнэлгийн барилга олныг тусгасан байдаг. Үүнээс болоод сургууль, цэцэрлэгийн барилгын ажил дандаа хоцордог. Үүнд анхаараарай гэлээ. Мөн Нийслэлийн Агаар, орчны бохирдлын асуудал хариуцсан төслүүдийн удирдагч Д.Мөнхжаргал Төрийн өмчийн барилгын дулаалгын ажил үргэлжлэх ёстой. Дэлхийн банкны цэвэр агаар төслийн хүрээнд энэ жил 12 сургууль, цэцэрлэгийн барилгыг дулаалсан. Энэ бол цахилгааны хэмнэлт. Тийм учраас энэ заалтуудыг оруулж байна гэв. Нийслэлийн Засаг дарга бөгөөд Улаанбаатар хотын захирагч С.Амарсайхан хэлэхдээ Нэг зүйлийг олон талаас нь шийднэ гээд олон зардал тавиад аль нь ч бүрэн гүйцэд шийдэгдэхгүй, нэг үгээр оромдоод орхиж болохгүй. Үндсэн чиглэлд тусгагдсан ажил, төслүүдийн давхцлыг сайн харж нягтал хэмээн холбогдох албан тушаалтнуудад үүрэг өглөө. Нийслэлийн эдийн засаг, нийгмийг 2020 онд хөгжүүлэх үндсэн чиглэлийн төслийг маргааш Нийслэлийн Иргэдийн төлөөлөгчдийн хуралд өргөн барина. Нийтэлсэн:Нийслэлийн ЗДТГ-ын Хэвлэл мэдээлэл, олон нийттэй харилцах хэлтэс