АНУ-ын Сан Франциско хотод болсон MFC холбооны холимог тулаанд өрсөлдсөн гавьяат тамирчин П.Өнөрбат, Ангууч хочит Б.Баттөр нар өрсөлдөгчөө ялав. П.Өнөрбатын хувьд хоёрдугаар үедээ Америк тулаанч Деннис Агуйларыг нокаутаар, Ангууч хочит Б.Баттөр эхний үед мөн Америк тулаанч Нэйтан Монтаног хүнд цохилтоор буулган авчээ. Тус октагонд нийт 22 тулаанч хөл тавьснаас Монгол Улсаа төлөөлж: - Ө.Тэмүүжин - П.Өнөрбат -Б.Баттөр - М.Нандин-Эрдэнэ нар хүч үзсэн юм. М.Нандин-Эрдэнэ нь MFC холбооны хөнгөн жингийн аваргын бүсээ хамгаалан тулалдаж, ялалтаа байгуулав.

Бүх цэргийн наадам маргааш Монгол бөхийн өргөөнд болно. Барилдаанд цэрэг, хүчний таван спорт хороонд харьяалагддаг аймаг, цэргийн цолтой болон залуу 256 бөх зодоглох юм. Үндэсний бөхийн цол чимэг олгодог 30 дахь удаагийн уг наадам нь 1992 оноос хойш зохион байгуулагдаж байгаа билээ. Сонирхуулахад, уг наадамд түрүүлсэн бөхчүүдээс Монгол Улсын дархан аварга нэг, улсын аварга хоёр, улсын гарьд хоёр, улсын заан нэг, улсын харцага гурав, улсын начин 13 төрөн гарсан байна.

2021 оны Боксын насанд хүрэгчдийн эрэгтэйчүүдийн ДАШТ 10 сарын 25-наас 11 сарын 6-ны өдрүүдэд Сербийн Белград хотноо зохион байгуулагдсан. Тус тэмцээнд МБХ-ны дэд ерөнхийлөгч Ц.Бат-Энх, М.Баянмөнх тэргүүтэй удирдлагууд оролцож, МБХ-ны гадаад харилцааг тэлж, өргөжүүлэх чиглэлээр олон уулзалт хийсэн билээ. МБХ-ны хувьд ОУБХ-ны ерөнхийлөгч Умар Кремлевтэй уулзалт зохион байгуулж, Монгол улсад айлчлахыг урьсан. ОУБХ-ны ерөнхийлөгч МБХ-ны урилгыг хүлээн авч, өнөөдөр манай улсад хүрэлцэн ирэх гэж байна. Тэрээр 19 цаг 40 минутад Чингис хаан нисэх онгоцны буудалд өөрийн зөвлөх болон ОУБХ-ны төлөөлөгчдийн хамт ирнэ. Монгол улсад хоёр хоногийн хугацаатай айлчлах бөгөөд МБХ-ны удирдлагуудтай уулзалт зохион байгуулахаас гадна Маргааш буюу 11 сарын 12-ны өдөр Ган спорт төвд МБХ-ны баг тамирчдын бэлтгэлтэй танилцаж хэвлэлийнхэнд нээлттэй мэдээлэл өгнө. Ташрамд сонирхуулахад, ОУБХ-ны ерөнхийлөгч Умар Кремлевийн хувьд 2020 оны 12 сарын 12-ны өдөр ОУБХ-ны ерөнхийлөгчөөр сонгогдсон. Түүний хувьд тамирчдын амжилтын үнэлэмжийг нэмэгдүүлэх зорилго тавин ажиллаж буй юм. Энэ жилийн хувьд ДАШТ-ийг өндөр шагналын сантай зохион байгуулж чадсан юм. ДАШТ-д жин тус бүрд түрүүлсэн тамирчин: Алт-100.000 ам.доллар Мөнгө-50.000 ам.доллар Хүрэл-20.000 ам.доллар тус тус олгосон юм.

Чөлөөт бөхийн залуучуудын буюу 23 хүртэлх насны дэлхийн аварга шалгаруулах тэмцээн Сербийн нийслэл Белград хотод өнгөрсөн амралтын өдрүүдэд боллоо. Тус тэмцээнийг манай улсын долоон тамирчин зорьсноос эмэгтэйчүүдийн -68 кг жинд Э.Дэлгэрмаа, эрэгтэйчүүдийн -61 кг жинд Н.Наранхүү нар хүрэл медаль хүртлээ. Харин эмэгтэйчүүдийн -53 кг жинд М.Мөнхгэрэл тавдугаар байр эзэлсэн.

Жүдо бөхийн дэлхийн цуврал тэмцээн, Бакугийн их дуулга өнгөрсөн амралтын өдрүүдэд боллоо. Тус тэмцээнийг манай улсын 22 тамирчин зорьсноос 2 мөнгө, 3 хүрэл медаль хүртэж багийн дүнгээр наймдугаар байр эзэллээ. Тодруулбал эмэгтэйчүүдийн -63 кг жинд Б.Ганхайч мөнгө эмэгтэйчүүдийн +78 кг жинд А.Адъяасүрэн мөнгө эмэгтэйчүүдийн -52 кг жинд Б.Хорлоодой хүрэл эрэгтэйчүүдийн -73 кг жинд Ц.Цогтбаатар хүрэл эрэгтэйчүүдийн +100 кг жинд О.Цэцэнцэнгэл хүрэл медалийг тус тус хүртлээ. Мөн эрэгтэй -60 кг жинд Э.Сумъяабазар тав эмэгтэй -48 кг жинд Г.Наранцэцэг тав эмэгтэй -57 кг жинд Л.Энхрийлэн тав эмэгтэй -70 кг жинд Ц.Энхчимэг долоо эмэгтэй -78 кг жинд Б.Эрдэнэт-Од долоодугаар байрыг тус тус эзэллээ. Медалийн дүнгээр Япон улс 5 алт, 1 мөнгө 4 хүрэл медальтайгаар Бакугийн их дуулгад тэргүүллээ.