Өнгөрсөн долоо хоногт спортын ертөнцөд болсон үйл явдлыг тоймлон хүргэж байна. 03 сарын 04 -Монголын оюутны спортын Универсиад III их наадмын волейболын шигшээ тэмцээн Спортын төв ордонд эхэлж, 8-нд өндөрлөлөө. -AFC Challenge Cup 2014 тэмцээний урьдчилсан шалгаруулалтад оролцож буй Монголын хөлбөмбөгийн шигшээ багийн тамирчид хоёр дахь тоглолтоо Афганистаны багтай хийж, тоглолт 1:0-ийн харьцаагаар Афганистаны багийн ялалтаар өндөрлөв. -Тайландын нийслэл Бангкок хотноо туялзуур сэлэмний Ази тивийн өсвөр, залуучуудын аварга шалгаруулах тэмцээн эхэллээ. Энэ үеэр Азийн туялзуур сэлэмний холбооноос 2015 оны залуучуудын ААШТ-ийг Улаанбаатарт зохион байгуулах шийдвэр гаргав. -ОУОХ-ны ерөнхийлөгч Жак Рогге МҮОХ-ны Ерөнхийлөгч Д.Загдсүрэнгийн чөлөөт бөхийг олимпийн төрлөөс хасах тухай яригдаж эхэлсэнтэй холбогдуулан илгээсэн албан бичигт хариу ирүүлж, МҮОХ-ны байр суурийг тодорхойлсонд талархал илэрхийлжээ. -Монголын үндэсний мөсний шагайн холбооноос УАШТ-ээ зохион байгууллаа. Тэмцээний багийн төрөлд 40, цуваа харваанд мөн 40 тамирчин сум тавихад Улаанбаатар хотын Р.Алтанхуяг, Б.Угтахбаяр нар түрүүлж, Архангайн шагайчид удаалжээ. 03 сарын 05 -Монгол Улсын Ерөнхийлөгчийн ивээл дор долоо дахь удаагаа зохион байгуулж буй Дуулиан-2020 тэмцээний хэсгийн тоглолтууд эхэллээ. 54 сургуулийн 202 баг найман насны ангилалд өрсөлдөж буй тус тэмцээн тавдугаар сарын 16-нд өндөрлөнө. 03 сарын 06 -FILA-гийн ерөнхийлөгчийн үүргийг орлон гүйцэтгэж буй Ненад Лалович олимпийн хөтөлбөрөөс бөхийн спортыг хасах зөвлөмж гарсантай холбогдуулан Лозанн хотноо ОУОХ-ны ерөнхийлөгч Жак Роггетой ажил хэргийн уулзалт хийв. -Герман улсад Химийн цом боксын олон улсын 40 дэх удаагийн тэмцээн нээлтээ хийлээ. Тэмцээнд Г.Ган-Эрдэнэ /49кг/ Ж.Еркин /52кг/, Н.Төгсцогт /56кг/, Д.Отгондалай /60кг/, З.Энхзориг /64кг/, Б.Түвшинбат /69кг/ нарын тамирчид өрсөлдөж байна. -Аваргуудын лигийн шөвгийн 16-гийн шатанд учраа таарсан Испанийн Реал Мадрид болон Английн Манчестер Юнайтед багийн тоглолт Олд Траффорд цэнгэлдэхэд болж, 1:2 харьцаатай талбайн зочин Реал Мадрид ялалт байгууллаа. -Чөлөөт бөхийг олимпийн төрлөөс хасахыг эсэргүүцэн Польшийн сонгомол барилдааны нэрт тамирчин Анжей Супрон Москва-1980 олимпийн мөнгөн медалиа ОУОХ-нд илгээжээ. -Бодь Интернэшнл компани өнгөрсөн сард Азийн марафон гүйлтийн аварга шалгаруулах 14 дэх удаагийн тэмцээнээс алтан медаль хүртсэн Гавьяат тамирчин Б.Сэр-Одтой хамтран ажиллах гэрээгээ сунгалаа. -AFC Challenge cup тэмцээний урьчилсан шатнаас Монголын хөлбөмбөгийн шигшээ баг хожил авч чадсангүй. Энэ өдөр Монголын баг гурав дахь тоглолтоо Шри Ланкын эсрэг хийж, 3:0 харьцаагаар ялагдал хүлээлээ. 03 сарын 07 -FILA-гийн ээлжит бус конгрессийг тавдугаар сарын 18-нд Москвад хуралдуулахаар шийдвэрлэсэн талаар FILA-г түр тэргүүлж байгаа Ненад Лалович зарлав. -Оросын алдарт бөх Бувайсар Сайтиев Хэрвээ ОУОХ бөхийн спортыг олимпийн наадамд эргүүлэн авбал би өөрийн алтан медалиараа тэднийг шагнана хэмээн мэдэгдэл хийв. Тэрээр олимпийн наадамд гурван удаа, ДАШТ-д долоон удаа түрүүлсэн, домогт тамирчин билээ. -Монголын байт харваан шигшээ багийн тамирчид ирэх тавдугаар сард Шанхай хотноо болох гранпри тэмцээний бэлтгэлээ базаахаар урд хөршийг зорилоо. 03 сарын 08 -Гүйлтийн цанын улсын аварга шалгаруулах тэмцээн Sky resort цанын баазад эхэллээ. 03 сарын 09 -Тэмээн поло-2013 өвлийн фестиваль Төв аймгийн Эрдэнэ суман дах Чингисийн хөшөө цогцолборт боллоо. -Монголын жүдо бөхийн шигшээ багийн тамирчидтай хамтарсан бэлтгэл хийхээр Францын жүдочид өчигдөр Монголд хөл тавилаа. Ирэх дөрөвдүгээр сард таван тивийн аварга шалгаруулах тэмцээн болох тул Францын жүдочид Европын аварга, цаашлаад ирэх тавдугаар сард болох World Masters-ын бэлтгэлээ базаахаар ийнхүү Монголд ирсэн байна. -Монголын залуу боксчид Филиппин улсын Замбалес хотноо ирэх даваа гаригт эхлэх Азийн залуучуудын аварга шалгаруулах тэмцээнд оролцохоор өчигдөр хилийн дээс алхлаа. -Монгол Улсын Гавьяат тамирчин Н.Төгсцогт Германы Халле хотноо болсон Химийн цом-ын тэмцээнд анх удаа түрүүлж, аварга боллоо. Тэрбээр 56 кг-ын жингийн аваргын алтан медалийн төлөө Францын боксчин Энтони Бретийг ялжээ. 03 сарын 10 -Японы мэргэжлийн сумо бөхийн хару башё Осака хотноо эхэллээ.

Монголын Жюү-Жицү бөхийн холбооноос нийт багш-дасгалжуулагч, тамирчид, сонирхогчдод зориулан анхны номоо гаргажээ. Энэхүү номонд Бразилын жюү-жицүгийн түүх, дүрэм, бүсний ангилал, тэмцээний зохион байгуулалтын журам, Монголд хэрхэн хөгжсөн талаар болон, барилдааны зарим техникийн онцлогийн талаар сонирхолтойгоор харуулсан байна. Номын талаар дэлгэрэнгүй мэдээлэл авахыг хүсвэл [email protected] хаягаар хандах болох ажээ.

Монгол Улсын Ерөнхийлөгчийн ивээл дор жил бүр уламжлал болгон зохион байгуулагддаг хүүхэд, залуучуудын футзалын Дуулиан-2020 тэмцээний 2013 оны улиралын тэмцээн буюу долоо дахь удаагийн тэмцээн эхлэхэд бэлэн боллоо. Энэ жилийн тэмцээнд нийт 53 сургуулийн 202 баг 8 насны ангилалд өрсөлдөхөд бэлэн болоод байна. Өнгөрсөн баасан гариг буюу хоёрдугаар сарын 22-ны өдөр багуудын сугалаа явагдсан бөгөөд хамгийн эхний тоглолтууд гуравдугаар сарын 2-3-ны өдрүүдэд эхэлнэ. Сугалааны үйл ажиллагааг нээж Их Талын Дуулиан ТББ-ын Удирдах Зөвлөлийн Дарга ноён Ч.Ганхуяг үг хэлж, хамгийн бага насны ангилал болох 11 насны ангилалын сугалааг сугалсан билээ. Харин бусад насны ангилалын сугалааг хүндэт зочдоор уригдаж ирсэн НБТСГ-ын харъяа Хан Уул Дүүрэг дахь БТСГ-ын дарга ноён н.Ганболд, ХасБанкнаас төлөөлөн ирсэн Их Талын Дуулиан ТББ-ын УЗ-ын гишүүн ноён н.Болд, ноён н.Ганболд нар хийсэн. Мөн хүүхдүүдийг баярлуулсан нэгэн бэлэг бол ХасБанкны хамт олноос өгсөн бэлэг билээ. ХасБанк нь Дуулиан-2020 тэмцээний анхны санаачлагчдын нэг бөгөөд жил бүр нийт 10 сургуулийг ивээн тэтгэж оруулдаг. Тиймээс энэ жил ивээн тэтгэж байгаа сургуулиудаас 10 багийн хувцас хэрэгслийг хүүхдүүдэд бэлэглэсэн билээ. Дуулиан-2020 тэмцээний финалийн тоглолт ирэх тавдугаар сарын 16-ны өдөр явагдана. Нийт шагналын сан 35,000,000 төгрөг ба хамгийн шилдэг сургууль 3,000,000 төгргөний шагналыг хожих боломжтой. Ингээд энэ жилийн тэмцээнд оролож байгаа баг тамирчиддаан өндрөөс өндөр амжилтыг хүсэн ерөөе. Дэлгэрэнгүй мэдээлэл болон сугалааны тохиролыг www.duulian2020.mn болон манай Дуулиан-2020 тэмцээний фейсбүүк хуудаснаас авах боломжтой.

Нийслэлийн оюутны спортын наадмын шатрын тэмцээн Хос мастер клубт хоёр дах өдрөө үргэлжилж байна.Тэмцээнд 16 их, дээд сургуулийн эрэгтэй 40, эмэгтэй 31, нийт 71 оюутан тамирчин оюун ухаанаа сорин өрсөлдөж байгаа бөгөөд олон улсын их мастер 2, ОУМ 1, ОУШХМ 3, спортын мастер 8, дэд мастер 8 оролцож байгаа нь тэмцээний чансааг харуулсан томоохон үзүүлэлт юм. Швейцарь системээр 7 өрөг наадах тэмцээнд 5 өргийн дараах байдлаар эрэгтэйчүүдээс дэд мастер Б.Өлзийбаяр, ОУИМ Ц.Батчулуун, дэд мастер Б.Ариунбүүвэй, дэд мастерБ.Мөчрөө нар тус бүр 3,5 оноотой, эмэгтэйчүүдээс ОУИМ Т.Батчимэг, ОУМ Д.Янжиндулам, ОУШХМ У.Лхамсүрэн, спортын мастер Ө.Нямтуяа нар мөн 3,5 оноотойгоор ангилал тус бүртээ тэргүүлж эхлээд байна. Тэмцээнийг Нийслэлийн Биеийн тамир, спортын газар, Монголын оюутны спортын холбоо, Монголын шатрын холбоо хамтран зохион байгуулж байгаа ба нийслэлийн шилдгүүд аймгуудын бүсээс шалгарсан шатарчдын хамтаар Монголын оюутны спортын III наадмын шигшээ тэмцээнд оролцох эрхээ авна. Тэмцээний дүн маргааш гарнагэж Нийслэлийн Биеийн тамир, спортын газраас мэдээллээ.

Сүүлийн жилүүдэд Монгол бөхийн томоохон илэрхийлэл болох цолонд хүндэтгэл үзүүлэх барилдаанууд уламжлал болон зохиогдох болсон. Тэгвэл ирэх ням гаригийн 14 цагт Монгол Бөхийн Өргөөнд Харцага цолтонд хүндэтгэл үзүүлэх барилдаан болох гэнэ. Уг барилдаанд улс, аймгийн алдар цолтой хүчит 128 бөхийн зодоглох аж. Сонирхуулахад Монгол бөхийн түүхэнд 38 Харцага цолтон төрсөн бөгөөд уг хүндэтгэлийн барилдаан долоо дахь удаагаа зохиогдож байгаа нь энэ юм.