Соёлын гавьяат зүтгэлтэн, Д.Нацагдоржийн шагналт зохиолч Д.Намсрайн нэрэмжит Утгын чимэг 2019 богино өгүүллэгийн наадам өчигдөр Монголын хүүхдийн ордонд боллоо. Тус наадамд Төрийн шагналт, зохиолч Д.Норов Хэрээний нулимс өгүүллэгээрээ тэргүүлсэн бол Хүрээ ахан дүүс бүлгэмийн гишүүн, зохиолч, доктор, профессор П.Батхуягийн Цаггүй газар өгүүллэг дэд байрт, зохиолч С.Пүрэвсүрэнгийн Аав, хүү хоёр өгүүллэг гуравдугаарт байрт орсон юм. Эрхэм уншигч танд Төрийн шагналт, зохиолч Далхаагийн Норовын Хэрээний нулимс өгүүллэгийг хүргэж байна. Хөөе та минь ээ, доройтсон нүдэнд юу сайныг та нар дуулсан уу? гэж яншаа ёнгинуур дуугаар орилсоор Баярт гуай ирж явна. Халуун зун үстэй дотортой зузаан ултай гутал, хөвөнтэй торгон өмд цамц өмсөөд, нэг гартаа зөөлөвчтэй сандлаа барин нөгөө гараар таягаа тулсан, тас хар шил зүүсэн майцгар өвгөн тийн дуугарсаар ойртон ирэхэд сэхээвчинд суугаа хөгшчүүд тоглоомдоо улайраад хариу дуугарсангүй, шуугилдана. Хэзээ хойно, Тэгвэл наад хоёр улцнаа эмчлээч гэх тохуутай дуун гарав. Тэгтэл тэр дуугарагчтай өрсөлдөх мэт Хүүе, Баярт гуай, Баярт аа, нааш ир, энд суугаад сайхан ярь гэж тоглоомын талбайн нөгөө захаас хоёр эмгэн зэрэг зэрэг дуудахад өвгөн тэдэнрүү хазганасхийн зүглэв. Энэ бол манай хорооллын орилоо шар өвгөдтэй нийлж даалуудаж хөзөрдөхгүй атлаа өдөржин энэ талбайгаар сандлаа чирэн холхиж, хөгшин залуу, таних танихгүй хэнийг ч болов хөөе хө, сайн уу. Чи дуулсан уу хэмээн тэртээ холоос дуудан ямар нэг сонин содон юм хэлнэ. Улс төр, хүүхдийн сахилга, тамхины хор, телевизийн шинэ мэдээ, ер ярихгүй сэдэв байхгүй. Харин эндхийнхэн бүгд түүнээс дайжин холдоно. Тэгэвч өвгөн гомдоно гэж үгүй. Заримын нь хойноос даган гэлдэрч, мөнөөхөө ярин залхаана. Түүний жонгиносон шингэн дуу талбайн хаана ч тод сонсогдоно. орилоо шар гэх хогийн ерийн нэршилээс илүү нэг л зэвүүн хүйтэн өнгө сонсогдоно. Учир нь энэ орилоо шар чинь насаараа эмнэлэгийн хүүр задалдаг ажил хийсэн юм гэнэ лээ гэсэн яриа тархаснаас хойш хүмүүс түүнээс дайжих болсон юм. Өвгөн ч үүнийг нь анзаардаг бололтой, цэцэрлэгт талбайн сандлуудад налайж суугаа хүмүүстэй суудал булаалдахгүй, өөрийн сандлаа чирч ирээд ойролцоохон суугаад жонгинон ярьж гарах. Бүсгүйчүүд хүүхэддээ /энэ өвгөнд битгий ойрт. Чихэр өгвөл сэмхэн хаячихаж бай. Идэж болохгүй шүү. Муухай хүн байгаа юм/ гэхчилэн захиж, өөрсдөө холуур дөлж явна. Тэгсэн атлаа чихэр өгөхөд нь авахгүй байж чадахгүй. Ярвайсхийн авч баярлаж гялайснаа хэлэх мөртлөө холдмогц хогийн савруу чихрийг нь хаяад гараа арчин тфү тфү, муу юм цаагуур гэх. Авахгүй байхаас айна. Авсан хойно айна. Чихрээс айж байгаа нь тэр. Би өвдсөн нүдэнд юу сайныг сонсох санаатай тэрүүхэнд саатан суутал өндөр туранхай өвгөн бас ирж зэрэгцэн суух зуур, -За манай хөгшин хэрээ өнөөдөр юу гэж гуаглаж байна гэв? Энэ бол бас манай хорооллын зангиа. Өдөр шөнө, өвөл зунгүй зангианаас салдаггүй хүн. Тиймээс эндхийн авгай нар түүнийг зангиатайгаа унтдаг гэж баталцгаадаг юм. Одоо л сонсоё гэж би товч хариулав -Энэ хэрээ мөд үхэхгүй, олон жил гуаглах байх шүү гээд зангиа шүлсээ годхийлгэн хаяв. Энэ өвгөн олон үггүй юм шиг атлаа дандаа тэр энэ хүн болон үйл хэргийн сүүдрийг гоочилсон зэвүүн үг хэлдэг болохоор нь эндхийнхэн бас түүнд дургүй. Гэвч нэг их айж дайжаад байдаггүй юм. Харин зангиа- т нь орилоо шар-ыгаа бол дандаа үзэн ядсан нэг юм хэлж явдаг ажээ. За тэгээд юу сайн гэнэ. Хаанаас мэдэв хэмээн хоёр эмгэн зэрэг зэрэг асуун дэргэдээ суудал зайчлан саймшрах нь энэ удаад өвгөнөөс зэнзийлэх цээрийг нь сонсох хүсэл нь дийлэв бололтой. Гэвч Баярт гуай өмнөхөн нь сандлаа тавин сууж тухлаад хэлж байна. Хэрээний нулимс Хэрээний нулимс нүдний ямар ч өвчинийг хойш урагшгүй нам болгодог гэнэ шүү хө. Хэрээ нөгөө дандаа нүд иддэг амьтан болхоор тэр гэнэ ээ. Тэр олон нүднээс чинь аль хэрэгтэйг нь сороод залгичихдаг болохоор нулимс нь тунгаасан эм бололгүй яахав. Хүүе ер, нээрэн тийм ш дээ. Үгүй тэгээд тэр хэрээний чинь нулимсыг яаж олдог байна. Амархан гэнэ ээ. Согтоож байгаад авчихдаг юм гэнэ. Согтоож ий. Нүгэл байгаа даа, тэгээд хар хэрээтэй архи уух хэрэг үү? Уусан ч яадаг юм. Зах дээрээс хонины толгой худалдаж аваад хоёр нүдэнд нь шпирицээр архи шахаад гадаа хаячихгүй юу даа. Өө хөөрхий тэгээд тэрийг нь тоншоод нөгөөх нь согтчихдог байх нь. Тэгэлгүй дээ. Тэгээд нисч чадахаа байчихаад, хэдэн зуун жил улай зовлон үзсэн амьтан болохоороо тэрийгээ санадаг биз. Уйлаад бөмбөрөөд байдаг юм байх аа. Ээ чааваас гэж. Үгүй тэгээд үнэн л байдаг байгаа даа, айн. Тэгж үзсэн хүн байна гэнэ үү? Байна аа байна. Хаа сайгүй л. Ишш баярт минь. Чи эрх биш эр юм байна даа, нэг арга бодооч. Хоёулаа дуран шиг нүдтэй болчихъё л доо гэцгээж биесээ нудралцан инээлдэв. Энэ өдрөөс хойш хэдхэн хоногийн дараа хэнгэрэг хагарна гэгч болов. Орой ажил тараад иртэл манай байрны өмнөх ганц аврага том улиасны орчимд эхнэр хүүхэн голцуу хоёр гурваараа зогсоод шивэр авир гэлцэж мод өөд заацгааж, хар хэрээд бархиралдан, мод тойрон нисэж заримдаа газар шүргэн алдан доош шунган дайрч, хүүхдүүд тэдэнрүү чулуу шидлэн яваач, зайлаач гэж хашгиралдан байв. Есөн давхар байшинтай жацуу энэ аварга улиас бол манайхны ганц бахархал юм. Навчис дундаа шувууны нэг лут сайхан үүртэй юм. Би юу болсоныг сониучирхан мөнөөх горзгор зангиат-д ойртон очвол тэр толгой дохин мэндлээд Одоо нөгөө хөгшин хэрээ хэрэгтэй байна санж гэж дуугарав. Би гайхасхийн асууж харвал Энэ хавьд явдаг нэг муу шар муур дээш авирч очоод үүрэнд байсан хэдэн ангайхайг нь бариад ирчихсэн л дээ. Тэгээд л энэ хоёр хэрээ галзуурч өдөржин бархирч модонд ойртсон бүхэнрүү дайрч байгаа юм гэв. Хөөрхийс үрт амьтан гэгч. Энэ хоёр эцэг эх нь байхдаа гэвэл өндөр өвгөн ийш тийш өлөдзөн Нөгөө орилоо шар хайчив аа. Хэрээний нулимсанд дуртай юмсан. Энэ хоёрыг барьж авбал одоо ч нэг асгаруулж өгнө дөө. Яг хэрэгтэй үед нь алга болчих юм. Бас тэр шар муурыг олж орилоогоор төхөөрүүлмээр байна. Тэрэнд айдас хүйдэс, эрээ цээр гэж байх биш гээд хямсайн инээмхийлэв. Тэгтэл ард зогсож байсан нэг охин Орилоо өвөө нулимсаа арчаад зогсож байсан. Харьсан байх аа гэж зангиат-руу зэвүүцэнгүй хялбалзан хэлээд эргэн одов. Миний сэтгэл зэхийрч, дотор хүйт оргиход би гэртээ оров. Гэвч тохитой сууж чадсангүй. Гадаа хэрээ зогсоо чөлөөгүй бархирах, эх хүүхдээ дуудан зандрах, зайлаач яваач гэж багачууд хашгиралдах дуулдсаар бүтэн оройг түгшүүрээр дүүргэж орхив. Золоор маргааш нь амралтын өдөр тул аажуу босож гадагш гарвал өчигдрийн түгшүүр нилээд намжсан бололтой. Мөнөөх хоёр хэрээ тамираа барсан, цөхөрсөн ч юм уу, шонгийн модны оройд сууж хааяа гон гон хийн гоншигонож байв. Харин хүүхдээ салхилуулсан, нарласан эхнэр хүүхнүүд бөөгнөрөн нэгэн зүйлийг шогшрон хүүрнэлдэхийг сонсвол орилоо шар гуай хөлөө хугалж, хавиргаа гэмтээсэн, эмнэлэгт хүндхэн байгаа гэлцэнэ. Учрыг асуувал ангайхай идсэн муурыг зангиат гуай шийтгэхээр шийдэж, хүүхдүүдээр бариулаад ойролцоох траншиний худагт хийгээд таглачихсан юмсанж. Мөнөөх жаалуудаас үүнийг сонссон орилоо шар амьтан тамлав гэж ихэд уурсан мөнөөх худгаас муурыг гаргах гэж байгаад дотогшоо унаж тийн хэмхэрсэн ажээ. Худагт орж муурыг гаргах зоригтой жаалууд олон байсан боловч өвгөн тэднийг хавьтуулаагүй гэнэ. Нөгөө хэрээний нулимс авах ч хаа байхав. Хэн нь хэрээ, хэн нь муур юм бэ дээ гэмээр юм болоод дотор зэгийлгэсээр өнгөрөв. Бид ч мартагнав. Гэтэл сар гаруйн дараа эхэн намрын нэгэн налгар сайхан өдөр хүүхдийн талбай дунд тэргэнцэрт суусан орилоо шар гэх Баярт гуайтай тааралдав. Хөл муут хүний тэргэнцэр дээр суугаад дугуйг гараар өнхрүүлэн Хөөе сайн уу хө, өнөөдөр чинь ялалтын өдөр, баярын мэнд хүргье гээд улам цээл болсон жонгинуур дуугаар холоос мэндлэв. Ойртон очвол давхар эмжээртэй морин хүрэмнийхээ энгэрт Халхин гол 1939 гэж латинаар бичсэн дайнд оролцсон ахмад дайчин гэсэн хоёр тэмдэг зүүжээ. Би өвгөнтэй мэндлээд тэсэлгүй мөнөөх хэрээний нулимсыг асууж орхив. Өвгөн инээж, Надад хэрэггүй ээ хө. Тэр авгайчуулын нүдэнд л гээд хар шилээ авбал ухархайдаа цийгээд цайчихсан хоёр нүд хөдөлгөөнгүй бүлтийж харагдав. Харин чихний нүхнээс сонсголын жижиг хэрэгсэл хар нүд мэт бултайж байлаа. Өвгөн Хөөе та минь ээ. Өнөөдөр чинь Халхын голын ялалтын өдөр. Та нар мартаагүй биздээ гэж жонгинон орилсоор сэхээвчинд суугаад даалууны гуншин уянгалуулж байгаа хөгшидийн зүг дугуйгаа өнхрүүлсээр одов. Харин мөнөөх аварга улиасны мөчир дээр нулимсаа ширгээсэн хоёр хэрээ таг дуугүй нэвсийн суугаад доор нь нүүр буруулан зогсоод талхны булан дээр архи цутган, хүн харчих вий хэмээн ийш тийш хялалзан, тэднээс нулимс авах аргаа хийж байгаа зангиат өвгөнийг уйтгартайяа ширтэн байлаа. 2019 оны арванхоёрдугаар сарын 14

Өнөөдөр Монголын зохиолчдын байгууллага үүсч хөгжсөний 91 жилийн ойн өдөр. Энэхүү ойн өдрөөрөө МЗЭ-ээс оны шилдэг богино өгүүллэг шалгаруулах Утгын чимэг наадмаа зохион байгуулах юм. Уг наадмыг энэ жил70 насны ой нь тохиож буй Монгол Улсын соёлын гавьяат зүтгэлтэн, Д.Нацагдоржийн болон МЗЭ-ийн шагналт, Утгын чимэг наадмын хошой тэргүүн, зохиолч Дамбадаржаагийн Намсрай агсны нэрэмжит болгон нэрт зохиолчийн гэр бүл, үр хүүхэд, Хөвсгөл аймгийн Рашаант сумын Улаанбаатар хот дахь нутгийн зөвлөл МЗЭ -тэй хамтран зохион байгуулж байгаагаар онцлог ажээ. Утгын чимэг-2019 наадмын сүүлчийн шатанд Н.Бадамжавын Эцэг, С.Батжаргалын Хөх илдний нууц, С.Баттулгын Зүүдний сахиул, П.Батхуягийн Цаггүй газар, Т.Баянсангийн Цагаан гэгээ тасрах үе, Д.Жамъянгийн Хот айлын лус, Ш.Ёолк Эхийн сэтгэл элдэггүй, Д.Норовын Хэрээний нулимс, С.Пүрэвсүрэнгийн Аав хүү хоёр, Д.Төрбатын Хөөрөг гэсэн 10 өгүүллэг тунаж үлдээд байгаа юм. Өнгөрсөн жилийн Утгын чимэг наадамд МЗЭ-ийн шагналт зохиолч Т.Бум-Эрдэнэ Олон болоорой өгүүллэгээрээ, 2018 онд яруу найрагч С.Дамдиндорж Гурван хэмжээс өгүүллэгээрээ, 2017 онд соёлын гавьяат зүтгэлтэн С.Пүрэв Уул, өвгөн хоёр өгүүллэгээрээ, 2016 онд сэтгүүлч, яруу найрагч Б.Лхагвасүрэн Яргуй нүдлэх цагаар өгүүллэгээрээ тус тус тэргүүлж байжээ.

Sweetymotion хамтлагийн продюсер,Никитон хамтлагийн даралтат хөгжимчин Б.Чинбат, түүний эхнэр Sweetymotion хамтлагийн дуучин Ц.Сарнай нар БНСУ-ын Сөүл хотноо мэс засалд орж,үргэлжлүүлэн эмчилгээ хийлгэж байгаа билээ. Санхүүгийн нөхцөл байдлаас шалтгаалан эмчилгээ хийлгэхэд бэрхшээл гарч байгаа тул Монголын урлагийн салбарын олон уран бүтээлчид нэгдэн, уран бүтээлч гэр бүлдтуслах Хос зүрхээ хамгаалъя хандивын аян өрнүүлэх, тоглолт хийх санаачилга гаргаад байна. Өчигдөр /2019.01.08/ аяныг зохион байгуулагчид хуралдаж,2020 оны хоёрдугаар сарын 1-нд Niciton Friends тоглолт, хоёрдугаар сарын 2-нд мэргэжлийн урлагийн байгууллагуудын нэгдсэн Аравт тоглолтуудыг зохион байгуулахаар боллоо. Дэлгэрэнгүй мэдээллийг өнөөдрөөс эхлэн зохион байгуулалтыг хариуцаж авсан багуудаас танилцуулах аж. Хос зүрхийг хамгаалъя сайн үйлсийн аянд Өвөрмонголчууд ч нэгджээ.

Монгол Улсын Төрийн соёрхолт дуучин Д.Болд болон сүүлийн үед залуучуудыгшуугиулаад байгаа шинэ эрэгтэй хамтлаг Vandebo нар хамтран хоёр дахьуран бүтээлээ өчигдөр орой цацан олны хүртээл болголоо. Чамд сонсогдож байна уу гэх энэхүү дууны аяыгБолд, үгийг Vandebo нар хийсэн бол клипний бичлэгийг TJ Entertainment гүйцэтгэжээ. Мөн Youtube хуудасныхан доор хэдэн зуун магтсан сэтгэгдэл бичсэн байгаагаас харвал тэдний хамтрал үзэгч олонд ихээхэн таалагдаж байгаа бололтой.

Монголын зохиолчдын эвлэлээс жил бүр зохион байгуулдаг 37 дахь удаагийн Болор цом яруу найргийн наадам энэ сарын 4-нд буюу маргааш Багануур дүүрэгт эхэлнэ. Болор цом-36 Дорноговь аймагт болж, тэргүүн найрагчаар Б.Баттулга тодорсон. Болор цом наадмын өмнөх өдөр нь уран үгсийн чуулган болдог уламжлалтай. Наадам албан ёсоор нэгдүгээр сарын 5-нд болох юм. 2020 онд Багануур дүүргийн түүхт 40 жилийн ой тохиох тул ийнхүү Монголын утга зохиолыг үндэслэгч, их зохиолч Д.Нацагдоржийн төрсөн нутаг Гүн Галуутайд зохион Болор цом наадмыг байгуулахаар шийдвэрлэсэн байна. Оны шилдэг шүлэг шалгаруулах наадмын ерөнхий зохион байгуулагчаар Багануур дүүргийн ЗДТГ, хамтран зохион байгуулагчаар МҮОНРТ, МЗЭ ажиллаж байна.