Монгол Улсын Засгийн газраас уран бүтээлчдэд мөнгөн шагнал олгох шийдвэр гаргажээ. Тодруулбал, БНХАУ-ын Учао хотод болсон олон улсын циркчдийн наадмаас мөнгөн медаль хүртсэн Монголын циркийн хөгжлийн төв-ийн уран бүтээлчдэд 40 сая, Монте-Карлогийн дэлхийн циркчдийн их наадмаас хүрэл медаль хүртсэн Монголын циркчдийн холбооны уран бүтээлчдэд 34 сая, Бүгд Найрамдах Чех Улсад болсон Косиан сангийн нэрэмжит олон улсын залуу хийлчдийн уралдаанд тэргүүн байр эзэлсэн Монгол Улсын Консерваторийн сонгодог хөгжмийн мэргэжлийн сургуулийн сурагч Ч.Цэцэнд 19 сая төгрөгийг олгохоор болжээ. Мөн хоёрдугаар байрын шагналт, ОХУ-ын Гнесний нэрэмжит Хөгжмийн коллежийн сурагч Т.Удвал, Хүүхдийн ордоны хийлийн дугуйлангийн сурагч Т.Эсүй нарт тус бүр 14 сая, гуравдугаар байр эзэлсэн Консерваторийн сонгодог хөгжмийн мэргэжлийн сургуулийн сурагч Ж.Нарансоёмбо, Ө.Мишээл нарт тус бүр есөн сая төгрөгийн мөнгөн шагнал олгох шийдвэрийг гаргажээ.

Дуучин Ц. Энгүүн The Voice шоуны ялагчаар тодорч байсан цаг саяхан. Тэрээр оны өмнө I'm in Love хэмээх эрч хүчтэй, цоглог хэмнэлтэй дуугаа гаргасан бөгөөд тухайн үед шүтэн бишрэгчид нь дараагийн уран бүтээлийг нь тэсэн ядан хүлээж буйгаа илэрхийлж байсан билээ. Ийнхүү тэрээр шүтэн бишрэгчдийнхээ сонорыг мялаахаар гуравдугаар сарын 7-ны өдөр Kaleidoscope хэмээх шинэхэн уран бүтээлээ цацжээ. Хэдийгээр дууны үг нь бүхэлдээ англи хэл дээр бичигдсэн ч ардын дууны хэв маягийг оруулж өгсөн нь энэхүү дууг орчин үеийн поп дуунуудаас илт ялгаруулж байна. Ингээд түүний шинэлэг уран бүтээлийг хүлээн авцгаая.

Зохиолч Б.Шүүдэрцэцэгийн шинэ бүтээл адал явдалт-уран сэтгэмжийн Улаан могой роман хэвлэгдлээ. Хамгийн сүүлд 1937 оны аймшигт хэлмэгдийн үеийн бодит түүхээс сэдэвлэсэн Хагацашгүй эмгэнэлт, уянгын роман бичсэн зохиолч уншигчдынхаа дунд дараагийн зохиолынхоо сэдвийн талаар хэлэлцүүлэг зохиож байсан нь Улаан могой роман болж хэвлэгджээ. 15 дугаар зууны дунд аж төрж буй Номундара, Чойжиндара нэртэй ихэр хоёр охины хувь тавилан луу, могойн кодтой. Номундара, Чойжиндара хоёр бол зургаан түмэн Монголд цуутай Түмэнбилигт зурхайчийн охид аж. Эцгийнхээ зурхайн эрдмийг өвлөсөн Номундарагийн амьдрал 2019 онд аж төрж буй Дуулим бүсгүйтэй нууцлаг сэжмээр холбогдоно. Зохиолын төгсгөлд Боди Алаг хааны үеийн монгол хатны булшнаас Kate Spade брэндийн хавтага олдсоны учир юу вэ? Сүүлийн үеийн гадаадын уран зохиолд нэг бол бодит баримтад суурилсан намтар зохиол, нэг бол уран сэтгэмжийн бүтээлүүд илүү зонхилж байна. Тиймээс, хаад, хатдын тухай түүхэн сэдвээс энэ удаа зайлсхийж, дундад зууны бага хаадын үе, орчин үе хоёрыг сүлэлдүүлсэн уран сэтгэмжийн зохиол бичихээр шийдсэн гэж зохиолч ярьж байна. Зунаас эхлээд уншигдынхаа дунд хүлээлт үүсгэсэн, өвөрмөц нэртэй зохиол нь ийнхүү хэвлэлтээс гарчээ. Зохиолчийн Хотол цагаан гүнж романыг Өвөр Монголын Хөх хотын хэвлэлийн хороо албан ёсны эрхтэйгээр монгол бичиг хөрвүүлж байгаа бол, энэ бүтээлийнх нь герман хэлний орчуулга эхэлсэн байгаа юм байна.

Хурд хамтлаг олон улсын эмэгтэйчүүдийн баярын өдөр буюу 2020.03.08-нд Буцааж нэхэхгүй хайр онлайн тоглолт зохион байгуулж, HD Mongol телевизээр шууд дамжуулахаа зарлалаа. Хурд хамтлаг нь олон улсад тархаад байгаа коронавирусийн халдвараас сэргийлэх үүднээс улсын хэмжээнд онцгой дэглэм тогтоогоод байгааг хүндэтгэн ийнхүү онлайн тоглолт зохион байгуулахаар болсон бөгөөд тоглолтынхоо дундуур хандивын аян өрнүүлж, цугларсан мөнгийг Улсын онцгой комисст хүлээлгэн өгөхөө илэрхийлсэн юм. Энэ мэдээг сонсоодШадар сайд, Улсын онцгой комиссын дарга Ө.Энхтүвшинкоронавирусийн эсрэг хийж, хэрэгжүүлж буй ажлынхаа талаар танилцуулсан юм. Тэрбээр БНСУ, Япон, Иран, Италиас ирж байгаа хүмүүсийг ЗамынҮүд, Буянт-Ухаа, Алтанбулаг боомтоор л авч байна. Хэрэв халдвартай хүн ороод ирвэл бидэнд туршлага байхгүй. Тиймээс оруулж ирэхгүй байхад бүх анхаарлаа хандуулж байна. Монголынхоо онцлогийг бид бүгд мэднэ. Тиймээс оруулж ирэхгүй байя. Орж ирсэн нөхцөлд бэлэн байдлыг хангасан байя гэж ажиллаж байна. Та бүхнийг эх орноо хайрласан. Эх орноороо бахархсан олон уран бүтээл туурвидгийг мэднэ. Урлагийнхнаа манлайлж байгаад баяртай байна. Та бүхний сайхан сэтгэлийн хандивын төгрөг тутам булаг болж ундрах болтугай хэмээн үг хэллээ. Мөн Хурд хамтлагийн ахлагч Д.ГанбаярБид Улсын онцгой комисст сэтгэлийн дэмжлэг үзүүлж онлайн тоглолт хийхээр шийдсэн. Монголчууд бид биеэ хайрлаж, хүндэлсэн цагт энэ айхтар өвчнийг даван гарч чадна. Тиймээс иргэд маань гэртээ суугаад хурд хамтлагийн шилдэг дууны тоглолтыг үзэх боломж олгож байгаа юм. Эмэгтэйчүүдийн баярыг тохиолдуулан тоглолт хийнэ. Бид онлайн тоглолтынхоо үеэр банканд хандивын данс нээгээд ард түмнээ уриалж хандив цуглуулаад Улсын онцгой комисст өргөн барина гэлээ. Энэ үеэрШадар сайд, Улсын онцгой комиссын дарга Ө.ЭнхтүвшинАрд түмний хандивыг юунд зарцуулснаа эргэн тайлагнах болно хэмээн нэмж хэлэв.